Վարչապետը հաստատել է իր ուկրաինացի գործընկերոջ Երևան այցելելու հրավերը

ՀՀ վարչապետ Տիգրան Սարգսյանը երկուշաբթի Ուկրաինայի Գերագույն Ռադայի նախագահ Վլադիմիր Լիտվինի հետ հանդիպման ժամանակ հաստատել է իր ուկրաինացի գործընկեր Նիկոլայ Ազարովի Երևան այցելելու հրավերը։

Լիտվինի գլխավորած ուկրաինական պատվիրակությունը երկուշաբթի պաշտոնական երկօրյա այցով Երևան է ժամանել՝ ՀՀ ԱԺ խոսնակ Հովիկ Աբրահամյանի հրավերով։

Ինչպես հաղորդում է հայկական կառավարության մամուլի ծառայությունը,  վարչապետը բարձր է գնահատել երկու երկրների միջև ձևավորված քաղաքական երկխոսության մակարդակը և կարևորել Վլադիմիր Լիտվինի այցը Հայաստան հայ-ուկրաինական փոխհարաբերությունների խորացման համատեքստում:

Հայ-ուկրաինական տնտեսական փոխգործակցության ընդլայնման գործում վարչապետ Սարգսյանն ընդգծել է առկա ողջ ներուժի լիարժեք իրացման անհրաժեշտությունը և այդ առումով կարևորել միջկառավարական հանձնաժաղովի աշխատանքները։

Հանդիպման ընթացքում կողմերը քննարկել են գյուղատնտեսության, շինարարության, էներգետիկայի, սննդարդյունաբերության, մեքենաշինության, տեղեկատվական տեխնոլոգիաների, դեղագործության և զբոսաշրջության բնագավառներում գործակցության զարգացման, ինչպես նաև միջտարածաշրջանային կապերի սերտացման հեռանկարները:

Անդրադարձ է կատարվել երկու երկրներում ընթացող բարեփոխումներին: -0-