ՀՀ վարչապետը Ռոստովի մարզում գտնվող Չալթր հայկական գյուղ է այցելել

ԵՐԵՎԱՆ, 9 հուլիսի. /Նովոստի-Արմենիա/. ՀՀ վարչապետ Տիգրան Սարգսյանը նախօրեին երեկոյան այցելել է Ռոստովի մարզի Մյասնիկյանի շրջանի Չալթր հայկական գյուղը, հաղորդում է հՀ կառավարության մամուլի ծառայությունը:

Գյուղի բնակիչները մեծ խանդավառությամբ են ընդունել ՀՀ կառավարության ղեկավարին:

Սարգսյանը ծանոթացել է տեղի հայության գործունեությանը, կենցաղին, պատմությանը,  այցելել է Չալթրի Սուրբ Համբարձում եկեղեցի, ապա ծաղիկներ դրել եկեղեցու բակում կանգնեցված հայ ժողովրդի` պատմության ընթացքում տված բազմաթիվ զոհերին նվիրված խաչքարի, ինչպես նաև Հայրենական մեծ պատերազմի զոհերի հիշատակը հավերժացնող հուշահամալիրի մոտ:

Ինչպես նշել է Սուրբ Համբարձում եկեղեցու հոգևոր հայր Տեր Թադևոս Հայբարյանը, այստեղ հայապահպանությունը բարձր մակարդակի վրա է: «Ընտանիքներում երեխաներին դեռևս մանկուց են սովորեցնում  հայերենը,  պահպանվում են հայկական ավանդույթները` սկսած արհեստներից վերջացրած ճաշատեսակներով», - ասել է հոգևորականը:

Այնուհետև ՀՀ կառավարության ղեկավարը եղել է Չալթրի  պատմա-ազգագրական թանգարանում, ծանոթացել ներկայացված ցուցանմուշներին:

Ռոստովի մարզի Մյասնիկյանի շրջանն ունի 8 հայկական գյուղ: Մյասնիկյանի շրջանում ընդհանուր առմամբ բնակվում է 30 հազար հայ, միայն Չալթրում` 15 հազար: Մյասնիկյանի շրջանում է գտնվում նաև Նոր Նախիջևան հայկական քաղաքը:-0-