ԵՐԵՎԱՆ, 7 հուլիսի. /Նովոստի-Արմենիա/. Չինաստանի արտաքին գործերի նախարար Յան Ձիեչին ՀՀ փոխարտգործնախարար Սերգեյ Մանասարյանի հետ հանդիպման ընթացքում կարևորել է երկկողմ հարաբերությունների հետագա զարգացման և ընդլայնման անհրաժեշտությունը, հաղորդում է ՀՀ ԱԳՆ մամուլի ծառայությունը:
Հանդիպումը տեղի է ունեցել Մանասարյանի գլխավորած հայկական պատվիրակության ՉԺՀ այցի շրջանակներում՝ ՀՀ և ՉԺՀ արտաքին գործերի նախարարությունների միջև հերթական խորհրդակցություններն անցկացնելու նպատակով: Հուլիսի 4-ին կայացած խորհրդակցությունների ժամանակ չինական կողմի պատվիրակությունը ղեկավարում էր ՉԺՀ արտաքին գործերի նախարարի տեղակալ Չեն Գոպինը:
«Անդրադառնալով կայացած խորհրդակցությունների արդյունքներին` Չինաստանի արտաքին գերատեսչության ղեկավարը դրական գնահատեց միջպետական շփումների դինամիկան և կարևորեց երկկողմ հարաբերությունների հետագա զարգացման և ընդլայնման անհրաժեշտությունը», - նշվում է տեղեկատվության մեջ:
Զրուցակիցները շեշտել են, որ 2012թ. նշվող երկու երկրների միջև դիվանագիտական հարաբերությունների հաստատման 20-րդ տարելիցին կողմերը լուրջ առաջխաղացում են արձանագրել քաղաքական, առևտրատնտեսական, մշակութային և հումանիտար համագործակցության բնագավառներում:
Այս առումով ՀՀ ԱԳ նախարարի տեղակալը կարևորել է 2012թ. ընթացքում բարձր մակարդակի փոխայցելություններ կազմակերպելու հարցը:
Կողմերը քննարկել են ՀՀ և ՉԺՀ երկկողմ հարաբերությունների հետագա զարգացման և խորացման հետ կապված հարցեր, համագործակցությունը ՄԱԿ-ի և այլ միջազգային կազմակերպությունների շրջանակներում:
Մտքեր փոխանակվեցին գիտության, մշակույթի, կրթության և այլ բնագավառներում նոր համատեղ ծրագրերի ու փոխանակումների իրականացման վերաբերյալ:
Շահագրգիռ քննարկում ծավալվեց նաև երկու երկրների միջև առևտրատնտեսական համագործակցության գործնական նախագծերի և փոխադարձ ներդրումների իրականացման շուրջ: Սերգեյ Մանասարյանը չինական կողմին տրամադրեց տեղեկատվություն տարածաշրջանային խնդիրների, ինչպես նաև հարևան պետությունների հետ հարաբերությունների վերջին զարգացումների վերաբերյալ:
Այցի շրջանակներում ՀՀ ԱԳ փոխնախարարը աշխատանքային հանդիպումներ ունեցավ նաև ՉԺՀ կոմերցիայի փոխնախարար Չուն Շանի, Արդի միջազգային հարաբերությունների ակադեմիայի փոխնախագահ Ցի Ջիեյի և Շանհայի փոխքաղաքապետ Շա Խայպինի հետ:-0-
