Երևանի ավագ դպրոցներում սեպտեմբերի 1-ից դասերը սկսվելու են տեղական ժամանակով ժամը 8:30-ին, բուհերում՝ 9:30-ին, ուրբաթ լրագրողներին տեղեկացրեց ՀՀ ԿԳ նախարար Արմեն Աշոտյանը:
«Մենք գնացինք քաղաքապետարանին ընդառաջ, և նախարարությունը համաձայնեց փոխել նախարարության ենթակայության տակ գտնվող ուսումնական հաստատությունների դասերի սկիզբը, որպեսզի առավոտյան քաղաքն ավելի ազատ շնչի, մարդիկ ավելի հեշտ հասնեն աշխատանքի և առավոտյան ժամը 9-ի սահմաններում խցանումներ չլինեն», - ասաց նա:
Նախարարի խոսքերով՝ Երևանի քաղաքապետարանն ավելի վաղ որոշում էր ընդունել քաղաքապետարանի ենթակայության տակ գտնվող միջնակարգ դպրոցներում դասերի ժամերի փոփոխության մասին և դիմել է ԿԳ նախարարությանը միանալ այս գործընթացին՝ առավոտյան ժամերին տրանսպորտային հոսքերը բեռնաթափելու համար:
Մինչև հիմա շատ համալսարաններ և դպրոցներ ինքնուրույն էին որոշում դասերի սկսվելու ժամերը: Ուսումնական հաստատությունների մեծամասնությունում դասերը սկսվում էին 9:00-ին, ինչի հետևանքով քաղաքում բազմաթիվ խցանումներ էին առաջանում, և շատ քաղաքացիներ դժվարությամբ էին հասնում աշխատանքի:-0-
