ՀՀ արդարադատության նախարարն առաջարկել է հետաձգել համաներման հարցի վերաբերյալ խորհրդարանի քվերակությունը
ՀՀ արդարադատության նախարար Հրայր Թովմասյանն առաջարկել է հետաձգել նախագահի առաջարկով համաներում հայտարարելու վերաբերյալ քվեարկությունը, որը քննարկվում է չորեքշաբթի Ազգային ժողովի կողմից՝ արտահերթ կարգով:
«Պատգամավորների կողմից առաջարկներ են ներկայացվել, որոնք քննարկման կարիք ունեն, և դրանց քննարկումից հետո ես կներկայացնեմ փաստաթղթի վերջնական տարբերակը, որը քվերակության կդրվի»,- խորհրդարանի նիստի ժամանակ ասաց նախարարը:
ՀՀ խորհրդարանը չորեքշաբթի նիստի ժամանակ արտահերթ կարգով սկսել էր քննարկել ՀՀ նախագահի՝ համաներման մասին առաջարկը, որն արվել է Հայաստանի անկախության 20-ամյակի կապակցությամբ:
Առաջարկված համաներմամբ 396 դատապարտյալ ազատ կարձակվի, կկրճատվի ևս 379 անձանց ժամկետը: Հասցված նյութական վնասի դիմաց վճարելու դեպքում ևս 153 մարդ կարող է ամբողջովին ազատվել պատժից, 195-ը՝ մասամբ ազատվել:
Նախարարի խոսքերով՝ համաներմամբ ազատազրկման հետ կապ չունեցող պատժից կազատվի 1400 մարդ:
Նա նաև նշեց, որ այսօրվա դրությամբ ՀՀ քրեակատարողական հաստատություններում պատիժ է կրում շուրջ չորս հազար մարդ, ևս 1110-ը գտնվում է նախնական կալանքի տակ:--0--
