ԵՐԵՎԱՆ, 12 նոյեմբերի. /Նովոստի-Արմենիա/. Հայաստանի և Հնդկաստանի մշակույթի նախարարությունների միջև 2011-2012 թթ. մշակութային համագործակցության մասին հուշագիր է ստորագրվել նախօրեին Դելիում, ուրբաթ «Նովոստի-Արմենիա» գործակալությանը հայտնեցին ԱԳՆ մամուլի ծառայությունից:
Փաստաթուղթը ՀՀ ԱԳՆ ղեկավար Էդվարդ Նալբանդյանի ներկայությամբ ստորագրեցին Հնդկաստանում ՀՀ դեսպան Արա Հակոբյանը և Հնդկաստանի մշակույթի նախարարության պետքարտուղար Ջավար Սիրկարը:
Ըստ մամուլի հաղորդագրության՝ մինչև ստորագրման արարողությունը ՀՀ արտգործնախարար Էդվարդ Նալբանդյանը և Հնդկաստանի արտգործնախարար Սոմանահալլի Մալլայահ Կրիշնան մանրամասն անդրադարձան կրթության, գիտության և մշակույթի ոլորտներում փոխգործակցությանը:
Հանդիպմանը քննարկվեցին Հայաստանում Հնդկաստանի մշակութային կենտրոնի հիմնադրման և հայաստանյան ԲՈՒՀ-երից մեկում հնդկական ուսումնասիրությունների ամբիոնի ստեղծման հնարավորությունները:
Այցի շրջանակներում Նալբանդյանը հանդիպեց նաև Միջազգային հարաբերությունների հնդկական Խորհրդի տնօրեն Սուդհիր Դևաերի հետ և քննարկեց ԱԳՆ դիվանագիտական դպրոցի և Խորհրդի միջև համագործակցության հնարավորությունները: --0--
