Երևանում դեկտեմբերին առաջին անգամ կանցկացվի ԱՊՀ երկրների Տեղեկատվական խորհրդի նիստը

ԱՊՀ երկրների Տեղեկատվական խորհրդի հերթական՝ 12-րդ նիստը կանցկացվի Հայաստանում այս տարվա դեկտեմբերին, ասաց ՀՀ մշակույթի նախարար Հասմիկ Պողոսյանը:

Երևանում ԱՊՀ երկրների Տեղեկատվական խորհրդի 12-րդ նիստի անցկացման նպատակով Հայաստանի կառավարության պահուստային ֆոնդից կհատկացվի 5,421 միլիոն դրամ (շուրջ 14,8 հազար ԱՄՆ դոլար)՝ «Արմենպրես» պետական լրատվական գործակալությանը տրամադրելու համար:

«Նախորդ նիստն անցկացվել է 2010 թ.-ի մարտին Բաքվում, որտեղ «ԻՏԱՌ-ՏԱՍՍ» լրատվական գործակալության գլխավոր տնօրենը (Վիտալի Իգնատենկո) առաջարկել է հաջորդ նիստն անցկացնել Երևանում՝ հատկապես հաշվի առնելով այն, որ մինչ օրս Հայաստանում նիստեր չեն անցկացվել», - ասաց Պողոսյանը:

Նա նաև տեղեկացրեց, որ 1996 թ.-ին ձևավորված ԱՊՀ երկրների Տեղեկատվական խորհրդի կազմում ընդգրկված են պետական լրատվական գործակալությունների ղեկավարները:

ԱՊՀ երկրների Տեղեկատվական խորհուրդը կոչված է աջակցել Համագործակցության ԶԼՄ-ների ներուժի ակտիվացմանը, տեղեկատվության տրամադրման արդյունավետության մակարդակի բարձրացմանը, ԱՊՀ պետությունների մասին օբյեկտիվ տեղեկատվության տարածմանը, ինչպես նաև Համագործակցության շրջանակներում իրականացվող ծրագրերին տեղեկատվական աջակցության ցուցաբերմանը:-0-