«Նաիրիտ» գործարանը խնդրում է հայկական ԶԼՄ-ներին ձեռնպահ մնալ չստուգված տեղեկատվության տարածումից

ԵՐԵՎԱՆ, 11 նոյեմբերի. /Նովոստի-Արմենիա/. «Նաիրիտ Գործարան» ՓԲԸ-ի հասարակայնության և ԶԼՄ-ների հետ կապերի ծառայությունը հինգշաբթի հայկական էլեկտրոնային ԶԼՄ-ներին ուղղված դիմում է տարածել՝ խնդրելով ձեռնպահ մնալ չստուգված տեղեկատվության տարածումից:

«Նաիրիտ» գործարանի աշխատակիցները հինգշաբթի կառավարության շենքի առջև բողոքի ակցիա են կազմակերպել՝ պահանջելով մարել աշխատավարձի պարտքերը: Հավաքված մարդկանց է մոտեցել Հայաստանի էներգետիկայի և բնական պաշարների նախարար Արմեն Մովսիսյանը, ով հավաստել է, որ տվյալ հարցը կլուծվի առաջիկա երեքշաբթի։

Գործարանի մամուլի ծառայության տեղեկատվության մեջ նշվում է, որ կապված աշխատավարձերի չվճարման խնդրի հետ՝ ստեղծվել է լարված իրավիճակ, և «այսօր էլեկտրոնային զանգվածային լրատվամիջոցների ապակողմնորոշիչ, իրականությանն ու ճշմարտությանը չհամապատասխանող  տեղեկատվության տարածումը կարող է ավելի սրել այն»:

«Նաիրիտ Գործարան» ՓԲԸ-ի հասարակայնության և ԶԼՄ-ների հետ կապերի ծառայությունը խնդրում է առաջիկայում ձեռնպահ մնալ չստուգված և չհիմնավորված տեղեկատվության տարածումից, «առավել ևս դրանցում չներքաշել քաղաքական գործիչներին և գործարանի հանգուցյալ աշխատակիցներին, ինչը կարող է անկանխատեսելի հետևանքներ ունենալ»:

«Նաիրիտ» գիտա-արտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ 1989թ.-ին «Նաիրիտը» փակվել էր՝ բնապահպանական նկատառումներով: Տարիների պարապուրդից հետո ձեռնարկության աշխատանքը մասնակիորեն վերսկսվել է 1992-93թթ.-ին:

2001թ. «Նաիրիտ» ոչ կառավարական կազմակերպությունից առանձացվեցին քլորոպենային կաուչուկի արտադրության համար անհրաժեշտ ուժեր, որոնց հիման վրա ստեղծվեց պարտքերից ազատված ձեռնարկությունը՝ «Նաիրիտ-2» ՓԲԸ-ն: 2006 թ.-ից գործարանի 90 տոկոս բաժնետոմսերի տերը  բրիտանական Rhinoville Property Limited կոնսորցիումն է, մնացած 10 տոկոս բաժնետոմսերը պատկանում են ՀՀ կառավարությանը՝ ի դեմս Էներգետիկայի և բնական ռեսուրսների նախարարության։ --0—