Նաթան եպիսկոպոս Հովհաննիսյանը Սուրբ Էջմիածնի հրատարակչական բաժնի տնօրեն է նշանակվել

Ամենայն Հայոց Գարեգին Բ Կաթողիկոսի բարձր տնօրինությամբ Մայր Աթոռ Սուրբ Էջմիածնի միաբան Նաթան եպիսկոպոս Հովհաննիսյանը նշանակվել է Մայր Աթոռի հրատարակչական բաժնի տնօրեն, հաղորդում է Սբ. Էջմիածնի տեղեկատվական համակարգը:

Նաթան եպիսկոպոս Հովհաննիսյանը (ավազանի անունը՝ Սամվել Հովհաննիսյան) ծնվել է 1955 թ. մայիսի 9-ին Երևանում։ Նախնական կրթությունը ստացել է թիվ 114 դպրոցում։ Մինչ ճեմարանն ընդունվելը սովորել է Երևանի Ա. Բաբաջանյանի անվան երաժշտական մանկավարժական ուսումնարանում, ապա՝ Երևանի Կոմիտասի անվան կոնսերվատորիայում՝ 1980թ. ավարտելով պրոֆ. Քեթի Մալխասյանի դասարանը։ 1997 թ. –ին ձեռնադրվել է եպիսկոպոս՝ ձեռամբ երջանկահիշատակ Գարեգին Ա Ամենայն Հայոց Կաթողիկոսի, և նշանակվել Ուկրաինայի հայոց թեմի առաջնորդ։ 2000 թ. -ին ընտրվել է Մեծ Բրիտանիայի հայոց թեմի առաջնորդ։

Սրբազան Հայրը մեծ ակտիվություն է ցուցաբերել էկումենիզմի ոլորտում: 1995թ.-ին Մոսկվայի և Համայն Ռուսիո պատրիարք Ալեքսի Բ-ի կողմից պարգևատրվել է «Իշխան Դանիել Մոսկվացու» շքանշանով: Ուկրաինայի նախագահի կողմից արժանացել է «Ծառայությունների համար» շքանշանի։ 2006թ.-ից Բեթղեհեմի պատվո քաղաքացի է:-0-