ԵՐԵՎԱՆ, 10 նոյեմբերի. /Նովոստի-Արմենիա/. Հայաստանի սպորտի և երիտասարդության հարցերով նախարարությունը 2011 թվականին «Երիտասարդության ազգային զեկույց» կներկայացնի, չորեքշաբթի լրագրողներին հայտնեց փոխնախարար Արսեն Քարամյանը։
«Մենք ծրագրում ենք համակողմանի ուսումնասիրություն անցկացնել և հնարավոր վիճակագրական տվյալներ հավաքել հայ երիտասարդության մասին, քանի որ տվյալ պահին տեղեկություններ չկան երկրում բնակվող երիտասարդների ճշգրիտ թվի մասին, հայտնի չէ, երիտասարդության որ մասը բարձրագույն կրթություն ունի, որ մասն է բախվում զբաղվածության և մի շարք այլ կարևորագույն հարցերի հետ»,- ասաց Քարամյանը։
Փոխնախարարը հիշեցրեց, որ 2007 թվականին կառավարությունն արդեն պատրաստել էր «Հայաստանի երիտասարդության ազգային զեկույց», սակայն այն շատ բացեր և թերություններ ուներ։ «Մենք պատրաստվում ենք նոր զեկույցում ավելի հավաստի և մանրամասն տեղեկություններ հավաքել երիտասարդության մասին»,- ասաց նա։
«Երիտասարդության խնդիրների լուծման և ավելի արդյունավետ պետական երիտասարդական քաղաքականություն վարելու համար կառավարությանը երիտասարդության մասին հավաստի տեղեկություն է անհրաժեշտ»,- կարծում է Քարամյանը։
2007 թվականին ներկայացրած «Հայաստանի երիտասարդության ազգային զեկույցը» հիմք հանդիսացավ «2008-2010 թթ. Հայաստանի պետական երիտասարդական քաղաքականության կառավարական ռազմավարության» համար։ -0-
