Մեծանուն հայ գեղանկարիչ Մինասի ևս երեք որմնանկար կարող են ռեստավրացիայի ենթարկվել 2011 թ.-ին. ՀՀ մշակույթի նախարարություն

ԵՐԵՎԱՆ, 9 նոյեմբերի. /Նովոստի-Արմենիա/. Մեծանուն հայ գեղանկարիչ Մինասի ևս երեք որմնանկարներ հնարավոր է ռեստավրացիայի ենթարկվեն 2011 թ.-ին, տեղեկացրեց ՀՀ մշակույթի նախարարության Ժամանակակից արվեստի վարչության պետ Սոնա Հարությունյանը:

«Իտալացի վարպետներն արդեն վերականգնել են Մինասի երեք՝ «Թորոս Ռոսլին», «Հանդիպում» և «Խաչքարի մոտ» որմնանկարները, և ևս երեք որմնանկար ռեստավրացիայի կարիք ունի: Այժմ մենք բանակցություններ ենք վարում, և հնարավոր է՝ մոտ ժամանակներս կկարողանանք լավ լուր հայտնել», - ասաց նա «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ:

Նրա խոսքերով՝ եթե առաջին երեք որմնանկարների վերականգնման համար պետությունը պետբյուջեից միջոցներ էր տրամադրել, մասնավորապես՝ «Հանդիպում» և «Խաչքարի մոտ» որմնանկարների ռեստավրացիայի համար 20 միլիոն դրամ էր (55,2 հազար դոլար) հատկացվել, ապա 2011 թ.-ի բյուջեով այդ նպատակների համար ֆինանսներ նախատեսված չեն, և պետք է հուսալ միայն մասնավոր հատվածի օգնությունը:

Մինասի որդի, Ջաջուռում գտնվող Մինասի թանգարանի տնօրեն, «Մինաս Ավետիսյան» հիմնադրամի նախագահ Արման Ավետիսյանն իր հերթին նշեց, որ «Երկանք» և «Գորգ են գործում» որմնանկարները շատ վատ վիճակում են:

«Նրանք գտնվում են էլեկտրատեխնիկական գործարանի շենքում, որտեղ են գտնվել նաև արդեն վերականգնված որմնանկարները: Ցրտի, քամու և խոնավության պայմաններում որմնանկարներն արագ փչանում են», - ասաց նա:

Հայ գեղանկարիչ, գծանկարիչ, թատրոնի նկարիչ, Հայաստանի վաստակավոր նկարիչ (1968) Մինաս Ավետիսյանը ծնվել է 1928 թվականի հուլիսի 20-ին՝ Շիրակի մարզի Ջաջուռ գյուղում։ Սովորել է Թերլեմեզյանի անվան ուսումնարանում, ավարտել է Երևանի գեղարվեստաթատերական ինստիտուտը, Լենինգրադի Ռեպինի անվան գեղանկարչության, քանդակագործության և ճարտարապետության  ինստիտուտը։

1960 թվականից ապրել է Երևանում։ Մինասի առաջին ցուցահանդեսը տեղի ունեցել 1960 թվականին, բայց նրան մեծ ճանաչում է բերել 1962 թվականին Երևանում անցկացված «Հինգ նկարիչների» ցուցահանդեսը։ 1960-1975 թվականների ընթացքում Մինասը ստեղծել է 500 մեծ ու փոքր կտավներ, գրեթե նույնքան նկարներ, 20 մեծ որմնանկար ու նախագծեր՝ թատերական մեկ տասնյակից ավելի ներկայացումների համար։ Նկարիչը ողբերգական կերպով մահացել է ավտովթարից՝ 1975 թվականի փետրվարի 24-ին Երևանում։ -0-