«Հավաքների մասին» հայկական նոր օրինագծի վերաբերյալ ԵԽ Վենետիկյան հանձնաժողովի եզրակացությունը կստացվի նոյեմբերի 16-ին, իսկ օրենքը կարող է ընդունվել մինչև տարեվերջ, երեքշաբթի լրագրողներին հայտնեց Հայաստանի նախագահի իրավական հարցերով օգնական Գևորգ Կոստանյանը։
Երեքշաբթի Երևանում սկսվել են «Հավաքների մասին» օրինագծի քննարկումները, որը մշակվել է Մարդու իրավունքների պաշտպանի կողմից հանրապետության նախագահի աշխատակազմի նախաձեռնությամբ։ Քննարկումներին մասնակցում են նաև միջազգային կազմակերպությունների ներկայացուցիչներ, ովքեր կներկայացնեն իրենց առաջարկները նախագծի առնչությամբ։
«Այժմ մենք հանրային քննարկումների փուլում ենք, որը թույլ կտա ամփոփել օրինագծի լրամշակման բոլոր առաջարկները։ Կարծում եմ, որ Վենետիկյան հանձնաժողովը նոյեմբերի 16-ին կներկայացնի իր պաշտոնական եզրակացությունը, ինչից հետո այն շրջանառության մեջ կդրվի։ Օրինագիծը շատ կարևոր և պրոգրեսիվ է, մենք կփորձենք, որ այն ընդունվի կամ խորհրդարանի արտահերթ նիստում, կամ վերջին նստաշրջանում (դեկտեմբերի 6-9-ը՝ ԱՌԿԱ)»,- ասաց Կոստանյանը։ -0-
