ԵՐԵՎԱՆ, 8 նոյեմբերի. /Նովոստի-Արմենիա/. VivaCell-MTS ընկերությունը առաջին անգամ Հայաստանում ռադիոհաճախականություններ կստանա LTE տոխնոլոգիայի գործարկման համար, որոշման համապատասխան նախագիծն արդեն ներկայացված է կարգավորիչի կայքում։
LTE-ն չորրորդ սերնդի (4G) կապի բջջային տեխնոլոգիա է։ Ապահովում է բազային կայանից մինչև բաժանորդի սարքը տվյալների մինչև 100 Մբիթ/վրկ և բաժանորդից մինչև կայան՝ մինչև 50 Մբիթ/վրկ արագություն։
Ինչպես նշվում է Հայաստանի Հանրային ծառայությունները կարգավորող հանձնաժողովի որոշման նախագծում, նիստի ընթացքում կարգավորիչը մտադիր է բավարարել «Ղ-Տելեկոմի» հայտը և տրամադրել Հայաստանի Հանրապետությունում LTE (երկարաժամկետ էվոլյուցիա) տեխնոլոգիայի միջոցով շարժական ռադիոկապի ցանցի կազմակերպման համար 40ՄՀց լայնությամբ Երևան քաղաքում` 2500-2520ՄՀց և 2620-2640ՄՀց, մարզերում` 2600-2640ՄՀց ռադիոհաճախակա-նությունների հատվածների օգտագործման թույլտվություն` մինչև 2019 թվականի նոյեմբերի 4-ը գործողության ժամկետով:
«Ղ-Տելեկոմը» սույն որոշումն ուժի մեջ մտնելու պահից 2-ամսյա ժամկետում պետք է վճարի 990 միլիոն դրամ:
Այս դիապազոնով ռադիոհաճախականությունների օգտագործման թույլտվության տրամադրման պայմաններին համապատասխան՝ VivaCell-MTS-ը պարտավորվում է LTE ցանցը շահագործման հանձնել մինչև 2011 թվականի մարտի 1-ը։
VivaCell-MTS բջջային օպերատորն արդեն սեպտեմբերին հայտարարել է այն մասին, որ շուտով Հայաստանում չորրորդ սերնդի լայնաշերտ ծառայություններ կգործարկի, որոնք հիմնված են «Երկարաժամկետ էվոլյուցիայի» (LTE) նոր տեխնոլոգիայի վրա։ Ընկերության գլխավոր տնօրեն Ռալֆ Յիրիկյանի խոսքերով՝ ընկերությունն արդեն LTE ներդրման աշխատանքներ է իրականացնում։
Ինչ վերաբերում է բջջային կապի մյուս երկու օպերատորներին, ապա «ԱրմենՏել» ընկերությունը (Beeline ապրանքանիշ) առայժմ քննարկում է Հայաստանում LTE ցանցի փորձնական ներդրման հնարավորությունը։ Ընկերությունը երկխոսություն է սկսել կարգավորիչի հետ և համապատասխան հաճախականությունների առկայության դեպում կանցնի ցանցի կառուցմանը։
Միաժամանակ Orange Armenia-ում նշում են, որ 4G տեխնոլոգիաները դեռևս թեստավորման փուլում են աշխարհում, ինչի կապակցությամբ ընկերությունն առայժմ շեշտադրում է 3G+ ցանցի զարգացումը, որի թողունակությունն այժմ կրկնակի գերազանցում է Հայաստանում ընկերության գրանցված հաճախորդների պահանջները։
VivaCell-MTS-ը գործում է հայկական շուկայում 2005 թ.-ից: VivaCell-MTS-ի բաժնետոմսերի 80 տոկոսը պատկանում է Ռուսաստանում և ԱՊՀ երկրներում բջջային կապի խոշորագույն օպերատոր «Մոբիլնիյե Տելեսիստեմի» (ՄՏՍ) ԲԲԸ-ին, մնացած 20 տոկոսը պատկանում է Fattouch Group լիբանանյան ներդրումային խմբին: ($1 – 359,9 դրամ).--0-
