ԵՐԵՎԱՆ, 3 նոյեմբերի. /Նովոստի-Արմենիա/. Հայաստանն ադեկվատ գործողություններով պետք է պատասխանի ադրբեջանական դիվերսիաներին, ասաց Ղարաբաղյան պատերազմի հերոս, ՀՀ պաշտպանամարզատեխնիկական հասարակական կազմակերպության նախագահ Արկադի Տեր-Թադևոսյանը (Կոմանդոս)։
Վերջին երեք ամսվա ընթացքում Ղարաբաղի հետ շփման գծում Ադրբեջանը երեք դիվերսիոն ակցիա է իրականացրել, որոնց արդյունքում մարդկային զոհեր են եղել: Օգոստոսի 31-ին և սեպտեմբերի 4-ին Ադրբեջանի կողմից կազմակերպված դիվերսիաները ձախողվել են: Ադրբեջանական հետախուզական-դիվերսիոն խմբերը նահանջել են՝ ընդհանուր առմամբ կորցնելով չորս զինծառայող:
Կոմանդոսի խոսքերով, ադրբեջանական դիվերսիաների արդյունքում տուժում են երկու կողմերն էլ, սակայն հայկական կողմը պետք է պատշաճ կերպով արձագանքի Ադրբեջանի բարձրաստիճան զինվորականների անմարդկային հրամաններին։
Միաժամանակ Տեր-Թադևոսյանը նշեց, որ Հայաստանի պաշտպանության նախարարությունը պետք է ավելի սերտ շփում հաստատի հասարակայնության հետ։
Ըստ նրա, Պաշտպանության նախարարության ներկայացուցիչները պետք է ավելի հաճախ ներկա լինեն տարբեր զորավարժությունների, ընդհանուր ժողովների, որտեղ ներկա կլինեն ծնողներ և զանգվածային լրատվամիջոցներ։
Կոմանդոսը նշեց, որ նման հանդիպումների ժամանակ պետք է բարձրացվեն և լուծվեն բանակում առկա խնդիրները։
Միաժամանակ ղարաբաղյան պատերազմի հերոսն ընդգծեց, որ հայկական բանակն այսօր շատ մարտունակ է, սակայն այնտեղ էլ, ինչպես միջանձնային հարաբերություններում, լարվածություններ և տարածայնություններ են առաջանում։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
