Հայաստանի նախկին արտգործնախարարը վաղաժամ է համարում ՀՀ ԱԺ-ի կողմից ԼՂՀ-ի անկախության ճանաչումը

Հայաստանի նախկին արտգործնախարար, ընդդիմադիր Հայ ազգային կոնգրեսի ներկայացուցիչ Ալեքսանդր Արզումանյանը վաղաժամ է համարում ՀՀ ԱԺ-ի կողմից ԼՂՀ-ի անկախության ճանաչումը

ՀՀ ԱԺ-ն հոկտեմբերի 28-ին միաձայն որոշել է հետաձգել «Ժառանգություն» ընդդիմադիր խմբակցության «ԼՂՀ անկախության ճանաչման մասին» օրինագծի քվեարկությունը մինչև դեկտեմբերի 9-ը: Քվեարկությունը հետաձգվել է կոալիցիոն կուսակցությունների առաջարկով՝ դեկտեմբերի 1-2-ն Աստանայում կայանալիք ԵԱՀԿ գագաթնաժողովի համատեքստում։

«Ես ողջունում եմ այս հարցը բարձրացնելու և այն քվեարկության ներկայացնելու հայ խորհրդարանականների նախաձեռնությունը՝ որպես միջազգային հանրությանն ուղղված ուղերձ այն մասին, որ չտեսնելով առաջընթաց ղարաբաղյան հակամարտության կարգավորման գործում՝ Հայաստանի խորհրդարանը կարող է ինքնուրույն գնալ Ղարաբաղի ճանաչման», - չորեքշաբթի լրագրողներին ասաց Արզումանյանը:

Ինչպես նշեց նախկին արտգործնախարարը, ինքը կիսում է իշխող ուժերի դիրքորոշումը, որի համաձայն՝ ԼՂՀ անկախության ճանաչումն այս պահին կվնասի ԵԱՀԿ ՄԽ-ի շրջանակներում ընթացող բանակցային գործընթացին:

Միաժամանակ Արզումանյանը նշեց, որ պատգամավորները լավ տարբերակ են ընտրել՝ օրակարգում օրինագիծը պահելու համար՝ միաժամանակ պահպանելով ցանկացած պահի քվեարկության հնարավորությունը:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-