ՀՀ ԱԳ նախարար Էդվարդ Նալբանդյանը երեքշաբթի ԱԳՆ համակարգի դիվանագիտական պաշտոններում աշխատանքի անցնող երիտասարդ դիվանագետներին հիշեցրել է Հայրենիքին նվիրված լինելու անհրաժեշտության մասին:
ՀՀ «Դիվանագիտական ծառայության մասին» օրենքի համաձայն՝ 2010թ. ամռանն անցկացված մրցույթի արդյունքում 9 անձինք ընդունվեցին աշխատանքի ԱԳՆ համակարգի դիվանագիտական պաշտոններում` 3-6 ամիս փորձաշրջանով: Երեքշաբթի ԱԳՆ փորձաշրջանը հաջողությամբ ավարտած հինգ դիվանագետներին ԱԳ նախարարի հրամանով շնորհվեց կցորդի`առաջին դիվանագիտական աստիճանը և նրանց հանձնվեցին դիվանագետի վկայականները:
«Դիվանագետ լինելը նախևառաջ նշանակում է նվիրվածություն Հայրենիքին: Նշականում է գիտակցել, որ Հայրենիքը, Հայրենիքի շահը վեր է ամեն ինչից:
Դիվանագետ լինելը պահանջում է մտավոր, ֆիզիկական և հոգևոր ուժերի մշտական լարում, բարձր աշխատունակություն, իհարկե, ֆիզիկական դիմացկունություն։ Դիվանագետի աշխատանքը չունի ավարտ կամ դադար: Արձակուրդ, վատ ինքազգացողություն, աշխատանքային ժամեր, հանգստյան օր. այս ամենը, իհարկե, կա դիվանագետի համար, բայց միայն տեսականորեն, որովհետև գործնականում իսկական դիվանագետը, իսկ ես հուսով եմ, որ դուք ցանկանում եք լինել իսկական դիվանագետ, աշխատանքի մեջ է միշտ», - ընդգծել է Նալբանդյանը:
ՀՀ ԱԳ նախարարն ավելացրել է, որ դիվանագետ լինելը նաև նշանակում է մշտապես սովորել` ոչ միայն հարստացնել գիտելիքները դիվանագիտության և միջազգային հարաբերությունների, այլ նաև` այլ, հնարավորինս շատ ասպարեզներում:
Միաժամանակ նախարարն ընդգծել է, որ Հայաստանում յուրաքանչյուր տասը հազար քաղաքացուց մեկին է միայն վիճակվում այդ պատիվը՝ լինել Հայաստանի Հանրապետության դիվանագետ: ՀՀ ԱԳ նախարարը հիշեցրել է, որ նախկինում շատերը նույնիսկ չէին համարձակվում երազել դիվանագետ դառնալու մասին. Հայաստանի դիվանագիտական ծառայությունը բուն իմաստով ձևավորված չէր:
«Գիտեմ, որ երազել եք այս օրվա մասին։ Ավելի ճիշտ՝ հուսով եմ, որ երազել եք, որովհետեւ բացի գիտելիքներից ու ունակություններից կարևոր է ձգտումը և նվիրվածությունը, որովհետև առանց այդ հատկանիշների դժվար է դառնալ լավ դիվանագետ: Ի տարբերություն նախորդ սերնդի, դուք այդ երազելու հնարավորությունն ունեցել եք, որովհետև մեծացել եք անկախ Հայաստանում», - մեջբերում է ՀՀ ԱԳ նախարարի խոսքերը ՀՀ ԱԳՆ մամուլի ծառայությունը:-0-
