ԵՐԵՎԱՆ, 1 նոյեմբերի. /Նովոստի-Արմենիա/. Հայաստանում սեռավարակների առավել մեծ թիվը մարզերում է, ասաց Առողջության հայ-ամերիկյան կենտրոնի գինեկոլոգիական բաժանմունքի պետ, բժշկական գիտությունների թեկնածու Մարինե Ոսկանյանը։
«Մարզերից տղամարդիկ արտերկիր են մեկնում և վերադառնալիս իրենց հետ սեռավարակների «փնջեր» են բերում։ Օրինակ, ոչ միայն տրիխոմոնիազ, այլ նաև գարդներելա»,- երկուշաբթի լրագրողներին ասաց Ոսկանյանը։
Նրա խոսքերով, գարդներելան և տրիխոմոնիազը Հայաստանում առավել տարածված սեռավարակներից են։
Ոսկանյանն ընդգծեց, որ Հայաստանում սեռական հիվանդություններով տառապողների թվի հստակ վիճակագրություն չկա, ինչը, նախևառաջ, բացատրվում է բազմաթիվ սեռական հիվանդությունների աննկատ ախտանիշներով, երկրորդ, բժշկական օգնության դիմելու ոչ հաճախակի դեպքերով։
Խոսելով Հայաստանում ընդհանուր առմամբ սեռավարակ հիվանդությունների տարածվածության մասին՝ Ոսկանյանն ընդգծեց, որ վերջերս զգալիորեն կրճատվել է սիֆիլիսով և հոնորեայով հիվանդների թիվը, ինչը կարելի է բացատրել բնակչության իրազեկվածությամբ և ժամանակին բժշկի օգնությանը դիմելով։
Միաժամանակ նա նշեց մի շարք սեռական վարակներ, որոնք գրեթե աննկատ ախտանիշներ ունեն մեկ-երկու օրվա ընթացքում մարմնի ջերմաստիճանի բարձրացումով և թույլ արտադրությամբ, որոնց նկատմամբ անուշադրությունը կարող է հանգեցնել լուրջ բարդացումների և խրոնիկ փուլի։
Խոսելով դրանց բուժման և կանխարգելման մեթոդների մասին՝ Ոսկանյանն առանձնացրեց մի շարք գործոններ։ Մասնավորապես, նա նշեց սեռական ակտերի ժամանակ որպես հակաբեղմնավորման միջոց պահպանակների պարտադիր, այլ ոչ թե կանանց հակաբեղմնավորման միջոցների օգտագործումը։
Միաժամանակ բժիշկն ընդգծեց, որ հաճախ սեռավարակների գրգռիչները կանանց մոտ պարույրներն են (ներարգանդային հակաբեղմնավորիչի տեսակ)։
Ոսկանյանը նշեց, որ կանանց սեռական վարակների պրոֆիլակտիկայի առավել արդյունավետ միջոցը մածունի և յոգուրտի կանոնավոր օգտագործումն է, որոնք պարունակում են դիսբակտերիոզը կանխող անհրաժեշտ լակտոբակտերիաները, քանի որ դիսբակտերիոզը բազմաթիվ սեռավարակների կատալիզատոր է։
Առողջության հայ-ամերիկյան կենտրոնի տնօրեն Անժելա Օհանյանն իր հերթին ընդգծեց, որ սեռական հիվանդությունների ախտորոշման առավել արդյունավետ մեթոդը ԴՆԹ-ախտորոշումն է, որը թույլ է տալիս բացահայտել ցանկացած հիվանդություն ամենավաղ փուլերում։
Օհանյանն ավելացրեց, որ Հայաստանում վերջին ժամանակներում սեքսի զգալի «երիտասարդացում» է նկատվում (սկսած 13 տարեկանից) և սեքս ծառայությունների հասանելիություն, ինչը համապատասխան դաստիարակության և իրազեկվածության համակցությամբ սեռական ինֆեկցիաներով վարակի է հանգեցնում։ -0-
