Հայկական նոր ատոմակայանի գլխավոր նախագծողը կլինի Մոսկվայի «Ատոմէներգոպրոեկտ» ԲԲԸ-ն, նշվում է ընկերության մամուլի ծառայության տեղեկատվության մեջ, հաղորդում է «ՌԻԱ Նովոստին»:
Հայաստանը նախատեսում է ԱԷԿ նոր բլոկ կառուցել՝ մոտավորապես 1000 ՄՎտ հզորությամբ, և այս նախագիծը կարժենա մոտ 5 մլրդ. դոլար։ Այս նախագծի իրականացման համար արտասահմանյան կապիտալ ներգրավելու նպաատկով 2006թ. ՀՀ խորհրդարանն օրենսդրությամբ անվավեր ճանաչեց նոր ատոմային բլոկների պետական մենաշնորհի իրավունքը։
««Ատոմէնեգրոպրոեկտը» օտարերկրյա նախագծերում մասնակցության զգալի փորձ ունի, մասնավորապես այն Իրանում Բուշերի ԱԷԿ-ի, Հնդկաստանում գտնվող Կուդամ-Կուլամ ԱԷԿ-ի, Բուլղարիիայի Բելենե ԱԷԿ-ի գլխավոր նախագծողն է: Գոյություն ունի պայմանավորվածություն այն մասին, որ ընկերությունն իրականացնելու է Հայաստանում ԱԷԿ-ի նախագծային աշխատանքները», - նշվում է տեղեկատվության մեջ:
Ռուսաստանն ու Հայաստանը օգոստոսի 20-ին հայկական տարածքում ատոմային էներգաբլոկի կառուցման հարցում համագործակցության մասին միջկառավարական համաձայնագիր են ստորագրել: Փաստաթուղթը ստորագրվել է Հայաստանի նախագահ Սերժ Սարգսյանի և պետական այցով Հայաստանում գտնվող Ռուսաստանի նախագահ Դմիտրի Մեդվեդևի բանակցությունների արդյունքում:
Ինչպես նախկինում տեղեկացրել էր Ռոսատոմի ղեկավար Սերգեյ Կիրիենկոն, Ռուսաստանը կարող է ֆինանսավորել Հայաստանում ատոմային էլեկտրակայանի կառուցման 20 տոկոսից ավելին:
Նրա խոսքերով՝ արդեն ստեղծվել է ռուս-հայկական համատեղ ընկերությունը՝ ԱԷԿ-ի կառուցման համար, որը պետք է ապահովի ատոմակայանի արժեքի 40 տոկոսից ավելին, իսկ 60 տոկոսը ծրագրվում է ներգրավել ներդրողների հաշվին: Միաժամանակ Կիրիենկոն ավելացրել է, որ դեռևս հայտնի չէ ԱԷԿ-ի կառուցման հստակ գինը, ամեն ինչ կախված կլինի «լցոնից», որը կընտրվի ԱԷԿ-ի համար:
Ինչ վերաբերում է ներդրողներին, ապա դրանց ներգրավմանն ուղղված բանակցությունները վարում է Հայաստանի կառավարությունը:-0-
