ԵՐԵՎԱՆ, 29 հոկտեմբերի. /Նովոստի-Արմենիա/. Ֆրանսիան սպասում է Ղարաբաղի վերաբերյալ աստրախանյան պայմանավորվածությունների շուտափույթ իրագործմանը, ասվում է ուրբաթ Հայաստանում Ֆրանսիայի դեսպանության կողմից տարածած Ֆրանսիայի ԱԳՆ մամուլի քարտուղար Բեռնար Վալերոյի հայտարարությունում։
Չորեքշաբթի Աստրախանի բանակցությունների արդյունքում ՀՀ նախագահ Սերժ Սարգսյանի, Ադրբեջանի նախագահ Իլհամ Ալիևի և ՌԴ նախագահ Դմիտրի Մեդվեդևի կողմից հռչակագիր է ստորագրվել, որը ռազմագերիների փոխանակում է նախատեսում և հումանիտար բնույթ է կրում: Հատուկ հռչակագիրն ուղղված է վստահության միջոցների ամրապնդմանը:
Վալերոն նշում է, որ «Ֆրանսիան ողջունում է, նախագահ Մեդվեդևի նախաձեռնությամբ, նախագահներ Իլհամ Ալիևի, Սերժ Սարգսյանի և Դմիտրի Մեդվեդևի ՝ հոկտեմբերի 27-ի Աստրախանի համատեղ հայտարարությունը։
«Ֆրանսիան ակնկալում է աստրախանյան պայմանավորվածությունների շուտափույթ կենսագործում։ Այս հակամարտությունը կարող է լուծվել միայն երկխոսության միջոցով՝ խաղաղ, կայուն և բարգավաճ ապագա ապահովելու Հայաստանի և Ադրբեջանի, ինչպես նաև ողջ տարածաշրջանի համար։ Միացյալ նահանգների և Ռուսաստանի հետ ԵԱՀԿ Մինսկի խումբը համանախագահող Ֆրանսիան չի խնայելու իր միջնորդական ջանքերը՝ օգնելու Լեռնային Ղարաբաղի հարցում ընդդիմացած Հայաստանին և Ադրբեջանին` հասնելու հակամարտության խաղաղ, արդար և կայուն կարգավորման»,- Վալերոյի խոսքերն է մեջբերում դեսպանության մամուլի ծառայությունը։
Ինչպես նշվում է հաղորդագրությունում, աստրախանյան հայտարարությամբ հակամարտող կողմերն ընդունում են բանակցված խաղաղ կարգավորման և հրադադարի ամրապնդման անհրաժեշտությունը՝ վստահության միջոցառումներով։ Որպես առաջին քայլ, կողմերը պարտավորվում են արագորեն ձեռնամուխ լինել իրենց մոտ պահվող գերիների և դիակների փոխանակմանը։
«Աստրախանում կողմերի ընդունած որոշումները կարող են նպաստել լարվածության և վերջին ամիսներին բազմապատկված հրադադարի խախտումների նվազեցմանը»,- ասվում է հաղորդագրությունում։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
