Հայ-ֆրանսիական հարաբերությունները գտնվում են ամենաբարձր մակարդակի վրա. Նալբանդյան

Հայաստանի և Ֆրանսիայի հարաբերությունները գտնվում են ամենաբարձր մակարդակի վրա` թե քաղաքական, թե տնտեսական և թե հումանիտար համագործակցության ոլորտներում, ասել է ՀՀ ԱԳ նախարար Էդվարդ Նալբանդյանը Հայաստանում Ֆրանսիայի նորանշանակ դեսպան Անրի Ռենոյի հետ հանդիպման ժամանակ, «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից:

Դեսպանը ՀՀ ԱԳ նախարար Էդվարդ Նալբանդյանին է հանձնել հավատարմագրերի պատճեները:

Նախարարը հույս է հայտնել, որ դեսպան Ռենոն իր կարևոր ներդրումը կունենա հայ-ֆրանսիական ավանդական բարեկամական հարաբերությունների առավել ամրապնդման գործում:

Դեսպանն իր հերթին շնորհակալություն է հայտնել բարեմաղթանքների համար և ընդգծել է, որ Ֆրանսիայում առանձնահատուկ ջերմությամբ են վերաբերվում հայ ժողովրդին և Հայաստանին և հատուկ կարևորություն են տալիս հարաբերությունների զարգացմանը երկու երկրների միջև:

Նա վստահեցրել է, որ կանի առավելագույնը տարբեր ոլորտներում երկկողմ համագործակցությունը առավել խորացնելու և ընդլայնելու համար:

Զրուցակիցները մտքեր են փոխանակել երկկողմ հարաբերությունների, ինչպես նաև մի շարք տարածաշրջանային և միջազգային հարցերի շուրջ: -0-