Ավստրիան աջակցում է տարածաշրջանի անվտանգությանն ու կայունությանն ուղղված Հայաստանի ջանքերին. դեսպան

Ավստրիան աջակցում է տարածաշրջանի անվտանգությանն ու կայունությանն ուղղված Հայաստանի ջանքերին, նախօրեին ՀՀ պաշտպանության նախարար Սեյրան Օհանյանի հետ հանդիպման ժամանակ ասել է Հայաստանում Ավստրիայի դեսպան Միքայել Պոստլը:

Պոստլը կարևորել է հայ-ավստրիական ռազմական համագործակցությունը և պաշտպանական հարցերի շուրջ բաց ու թափանցիկ քննարկումները:

Հանդիպման ընթացքում Օհանյանը ներկայացրել է ՀՀ պաշտպանական քաղաքականությունը և անվտանգության միջավայրը:

Նա կարևորել է ՀՀ ՊՆ միջազգային ռազմական համագործակցության շրջանակներում Ավստրիայի հետ իրականացվող ռազմական համագործակցությունը` նշելով, որ ՆԱՏՕ-ի Գործընկերություն հանուն խաղաղության ծրագրի շրջանակներում, ինչպես նաև երկկողմ ձևաչափով ռազմաքաղաքական երկխոսությունը նպաստում է ռազմական մի շարք ուղղություններում, հատկապես խաղաղապահության մեջ ստանալ ավստրիացի մասնագետների խորհրդատվական աջակցությունը:

Հանդիպմանը մասնակցել է նաև ռազմական կցորդ, բրիգադի գեներալ Հելմուտ Ֆելները:-0-