Լեռնային Ղարաբաղի վերաբերյալ հակահայկական բանաձևի նախագիծը կքննարկվի ՆԱՏՕ ԽՎ հերթական նիստի ժամանակ. թերթ

Լեռնային Ղարաբաղի վերաբերյալ հակահայկական բանաձևի նախագիծը կքննարկվի նոյեմբերի 12-16-ը կայանալիք ՆԱՏՕ-ի Խորհրդարանական վեհաժողովի հերթական նիստի ժամանակ, գրում է «Հայկական ժամանակ» թերթը:

Թերթի պնդմամբ` այս պահին բանաձևը հայտնվել է նրանց ձեռքի տակ, և նրանում Լեռնային Ղարաբաղի հարակից տարածքները անվանված են «օկուպացված»:

Օրինագիծը բաղկացած է 6 կետից, իսկ նրա հեղինակն է կանադացի պատգամավոր Ռայնլ Անդրեյչուկը:

Օրինագիծը նոյեմբերի 13-ին և 14-ին կքննարկվի ՆԱՏՕ ԽՎ-ի տարբեր հանձնաժողովների մակարդակում, ինչից հետո կներառվի լիագումար նիստի օրակարգում:

Թերթը նշում է, որ ՆԱՏՕ-ն առաջին անգամ է միջամտում ղարաբաղյան հակամարտության կարգավորմանը:

Այս ամենը հատկանշական է այն ֆոնի ներքո, որ դեռ հուլիսի 30-ին ՀՀ ԱԺ խոսնակ Հովիկ Աբրահամյանը ՆԱՏՕ ԽՎ-ի նախագահ Ջոն Թաներին ուղղված իր նամակում խնդրել էր կազմակերպությանը ձեռնպահ մնալ ղարաբաղյան հակամարտության կարգավորման քննարկումներից:-0-