ՀՀ մարդու իրավունքների պաշտպան Արմեն Հարությունյանը հինգշաբթի խորհրդարանում ներկայացրել է «2009 թ. ընթացքում ՀՀ մարդու իրավունքների պաշտպանի գործունեության և երկրում մարդու իրավունքների ու հիմնարար ազատությունների խախտման մասին» տարեկան զեկույցը:
Ինչպես նիստի ընթացքում նշել է Հարությունյանը, 2009 թ.-ի ընթացքում գրասենյակ է դիմել շուրջ 4,7 հազար մարդ, ովքեր ավելի քան 3700 դիմում-բողոք են ներկայացրել, որոնցից 61.4 տոկոսը՝ Երևանից:
«Ներկայացված դիմում-բողոքներով 378 մարդ կարողացել է վերականգնել իր խախտված իրավունքները», - ասել է Հարությանյանը:
Միաժամանակ նա նշել է, որ 2009 թ.-ին քաղաքացիների բողոքների մեծ մասը վերաբերել են ոստիկանությանը, Երևանի քաղաքապետարանին, ՀՀ կրթության և գիտության նախարարությանը, դատարաններին և աշխատանքի ու սոցիալական հարցերի նախարարությանը:
«Աշխատանքի այսքան տարիների ընթացքում առաջին անգամ մենք այսքան քանակությամբ բողոք ենք արձանագրել կրթության և գիտության նախարարության նկատմամբ, որը, սակայն, ավելի շատ կապված է համակարգում անցկացվող բարեփոխումների կապակցությամբ քաղաքացիների դժգոհության հետ, քան նրանց իրավունքների անմիջական խախտման փաստերի հետ», - ասել է Հարությունյանը:
Միաժամանակ նա նշել է, որ այսօրվա դրությամբ Հայաստանում չկա պետական կառույց, որի հետ աշխատելիս Մարդու իրավունքների պաշտպանի գրասենյակը բախվեր դժվարությունների հետ շփման կամ տեղեկատվություն ստանալու գործում:
«Այս հարցում դրական առաջընթաց կա, որը մեզ ուրախացնում է», - ասել է Մարդու իրավունքների պաշտպանը:
Ինչպես զեկույցի ներկայացումից հետո նշել է ՀՀ ԱԺ պատգամավոր, Հայաստանի առաջին օմբուդսմեն Լարիսա Ալավերդյանը, «զեկույցը խորհրդարանի քննարկմանն է ներկայացվում խախտումներով, քանի որ այն պետք է ընթերցվի ոչ թե աշնանային, այլ գարնանային նստաշրջանի ժամանակ»:
«Զեկույցը ներկայացվում է՝ բացթողումներն ու ուղղությունները բացահայտելու նպատակով, որոնց ուղղությամբ Մարդու իրավունքների պաշտպանը ընթացիկ տարում պետք է ավելի ակտիվ աշխատի, իսկ 2009 թ.-ի զեկույցի քննարկումն այսօր կորցնում է իր հրատապությունը», - ասել է Ալավերդյանը:
Ինչպես այս կապակցությամբ նշել է ԱԺ մարդու իրավունքների պաշտպանության և հանրային հարցերի մշտական հանձնաժողովի փոխնախագահ Ռաֆիկ Պետրոսյանը, մարդու իրավունքների պաշտպանը հսկայական և լուրջ աշխատանք է կատարել, սակայն տեխնիկական պատճառներով զեկույցը չի ներկայացվել գարնանային նստաշրջանի ժամանակ:-0-
