Ոստիկանության տեսուչը մեղադրվում է երթևեկության կանոնները խախտելու համար. Գլխավոր դատախազություն

ԵՐԵՎԱՆ, 28 հոկտեմբերի. /Նովոստի-Արմենիա/. Հատուկ քննչական ծառայությունում ավարտվել է ոստիկանության` Տավուշի բաժնի պրոֆիլակտիկայի բաժանմունքի տեղամասային տեսուչի կողմից ճանապարհային երթևեկության և տրանսպորտային միջոցների շահագործման  կանոնները խախտելու դեպքի առթիվ  հարուցված քրեական գործի նախաքննությունը, հաղորդում է ՀՀ Գլխավոր դատախազության մամուլի ծառայությունը։

«Նախաքննությամբ պարզվել և հիմնավորվել է, որ  ոստիկանության` Տավուշի բաժնի պրոֆիլակտիկայի բաժանմունքի տեղամասային տեսուչ Վ. Թամրազյանը  խախտել է երթևեկության կանոնները, ինչն անզգուշությամբ առաջացրել է մարդու մահ»,- ասվում է հաղորդագրության մեջ։

Մասնավորապես`  Վ. Թամրազյանը 2010թ. օգոստոսի 24-ին` ժամը 22:00-ի սահմաններում, Բերդ-Իջևան ավտոճանապարհի 56-րդ կմ հատվածում թույլ է տվել  ճանապարհային երթևեկության կանոնների 67-րդ կետի պահանջին հակասող գործողություններ.  ունենալով կանխման տեխնիկական հնարավորություն` նա  վրաերթի է ենթարկել  Տավուշի մարզի Այգեհովիտ գյուղի բնակիչ Գ. Քալանթարյանին, ով ստացած մարմնական վնասվածքներից  մահացել է:

Ձեռք բերված ապացույցների հիման վրա` Վ. Թամրազյանին մեղադրանք է առաջադրվել  ՀՀ քրեական օրենսգրքի  242-րդ հոդվածի 2-րդ մասով:

Քրեական գործի նախաքննության օրինականության նկատմամբ  հսկողություն իրականացնող դատախազը հաստատել է  մեղադրական եզրակացությունը:

Քրեական գործն  ուղարկվել է Տավուշի մարզի ընդհանուր  իրավասության դատարան` ըստ էության քննելու համար: -0-