Հայաստանի և Ադրբեջանի նախագահները պայմանավորվել են փոխանակել ռազմագերիներին. Մեդվեդև

ԵՐԵՎԱՆ, 27 հոկտեմբերի. /Նովոստի-Արմենիա/. Հայաստանի և Ադրբեջանի նախագահները պայմանավորվել են փոխանակել ռազմագերիներին և վերադարձնել մահացածների դիակները, հաղորդում է ՌԻԱ Նովոստին:

«Քիչ առաջ կողմերի միջև համատեղ հայտարարություն է համաձայնեցվել, որը մարդասիրական բնույթ է կրում, սակայն շատ կարևոր է՝ հաշվի առնելով տարաբնույթ բարդությունները, որոնք այսօր նկատվում են Լեռնային Ղարաբաղի շուրջ Հայաստանի և Ադրբեջանի հարաբերություններում։ Խոսքը հատուկ հռչակագրի մասին է, որն ուղղված է վստահության միջոցների ամրապնդմանը, որպեսզի առանց հետաձգման իրականացվի ռազմագերիների փոխանակումն ու զոհվածների դիակները վերադարձնելը»,- ասաց Մեդվեդևը։

Եռակողմ հանդիպման արդյունքում Ռուսաստանի, Ադրբեջանի և Հայաստանի նախագահները նաև համատեղ հայտարարություն են համաձայնեցրել, որտեղ ընդգծված է, որ հակամարտության կարգավորումը քաղաքական-դիվանագիտական միջոցներով վստահության միջոցների հետագա ջանքեր է պահանջում հրադադարի և ռազմական բնագավառում։

Այդ նպատակով Ադրբեջանի և Հայաստանի նախագահները պայմանավորվել են որպես առաջին քայլ անհապաղ ռազմագերիների փոխանակում  և զոհվածների դիակների վերադարձ իրականացնել՝ ԵԱՀԿ Մինսկի խմբի համանախագահների և Կարմիր Խաչի Միջազգային կոմիտեի աջակցությամբ, ինչպես նաև հետագայում, ելնելով հարցերի բացառիկ մարդասիրական բնույթից, առաջնորդվել այդ մոտեցումներով»,- ասվում է փաստաթղթում։  ՌԴ նախագահը նշել է, որ այս թեման բավական դրամատիկական է, սակայն՝ մասնավոր։

«Բայց այն շատ կարևոր է, կողմերն արդեն վաղուց ուղիղ բաց հարթության մեջ չեն գտնվում, բայց կան խնդիրներ, կան կրակոցներ, մարդիկ են զոհվում և ինչ-որ պահի պետք է բացահայտ նայել իրավիճակին, քայլեր անել միմյանց հանդեպ, փորձել ապաարգելափակել թեև ոչ մեծ, բայց շատ կարևոր հարցերը»,- ասաց Մեդվեդևը։

Ռուսական պետության ղեկավարը հիշեցրեց, որ ինքն արդեն յոթերորդ անգամ է նման հանդիպում անցկացնում։ «Եվ ընդհանուր առմամբ դրանք հասարակ հանդիպումներ չեն, բավական կոպիտ բանավեճերով են անցնում, երբեմն՝ էմոցիաներով։ Դա հեշտ չէ նաև միջնորդ կողմի՝ ինչպես Մինսկի խմբի, այնպես էլ Ռուսաստանի՝ որպես համանախագահ երկրի համար։ Ես կարծում եմ, որ այդ հանդիպումները շատ օգտակար են»,- ասաց Մեդվեդևը։

Ըստ նրա, բանակցությունները միշտ ավելի լավ են, քան հակամարտության ակտիվ փուլը, բացի այդ, խոսքը ոչ միայն բանակցությունների, այլ նաև առաջխաղացման մասին է։ -0-