ՀՀ արդարադատության նախարարությունը երկրի նոտարական գրասենյակներում ստուգումներ անցկացնելու մասին ՀԴԲ-ի մտադրությունների մասին տեղեկատվություն չունի

ՀՀ արդարադատության նախարարությունը տեղեկատվություն չունի այն մասին, թե Հետաքննությունների դաշնային բյուրոն իբր մտադիր է ստուգել հայկական նոտարական գրասենյակները, «Նովոստի-Արմենիա» գործակալությանը ասաց ՀՀ արդարադատության նախարարի մամուլի քարտուղար Լանա Մշեցյանը՝ մեկնաբանելով ընդդիմադիր մամուլում լույս տեսած հրապարակումները:

Երեքշաբթի «Հայկական ժամանակ» թերթը տեղեկացրել է, որ ԱՄՆ-ի Հետաքննությունների դաշնային բյուրոյի աշխատակիցները, ովքեր այժմ Հայաստանում են, մտադիր են ստուգումներ իրականացնել հայկական նոտարական գրասենյակներում: Ըստ պարբերականի, ՀԴԲ-ն ցանկանում է ստուգել ԱՄՆ-ում ձերբակալված հայկական հանցավոր խմբավորման անդամների կողմից բնակարանների ձեռքբերման գործարքների օրինականությունը։

«Մենք նման տեղեկատվություն չունենք, և մեր նախարարությունը որևէ հարցում չի ստացել», - ասաց Մշեցյանը:

Նյու Յորքում և Լոս-Անջելեսում հոկտեմբերի 13-ին հանցավոր խմբավորման շուրջ 40 անդամ է ձերբակալվել, որի պարագլուխները Հայաստանից եկած ներգաղթյալներ կամ ՀՀ քաղաքացիներ են: Ձերբակալված քաղաքացիներին մեղադրում են այն բանի մեջ, որ ԱՄՆ-ի 25 նահանգներում 118 գոյություն չունեցող բժշկական հաստատությունների ցանցի ստեղծման միջոցով նրանք հափշտակել են շուրջ 162 միլիոն դոլար, ինչը այդ ոլորտի պատմության մեջ խոշորագույն մեքենայությունն է: Հետաքննության տվյալների համաձայն՝ հայկական հանցավոր խմբավորման պարագլուխն է «օրենքով գող» Արմեն Ղազարյանը «Պզո» մականունով, ով ձերբակալվել է Երևանում 2009 թ.-ի ապրիլի 7-ին: -0-