Գորան Բրեգովիչն առաջին անգամ ելույթ կունենա Հայաստանում
Հայտնի սերբ երաժիշտ և կոմպոզիտոր Գորան Բրեգովիչը «Ալկոհոլ» ծրագրով նոյեմբերի 15-ին առաջին անգամ ելույթ կունենա Հայաստանում՝ «Երևանյան հեռանկարներ» միջազգային 11-րդ փառատոնի շրջանակներում, ասաց փառատոնի նախագահ, կոմպոզիտոր Ստեփան Ռոստոմյանը։
Փառատոնը Հայաստանում անցկացվում է 11 տարի անընդմեջ «21-ի հեռանկարներ» անվանումով, սակայն այս տարի վերանվանվել է «Երևանյան հեռանկարներ»:
Փառատոնի շրջանակներում Հայաստանում ելույթ են ունեցել համաշխարհային մեծության այնպիսի աստղեր, ինչպիսիք են Յուրի Բաշմետը, Վիկտոր Տրետյակովը, Սթիվեն Իսերլիսը, Քշիշտոֆ Պենդերեցկին, Պինկաս Ցուկերմանը, ինչպես նաև Լոնդոնի թագավորական ֆիլհարմոնիկ նվագախումբը:
«Այս մարդը բացառիկ տաղանդի տեր անձնավորություն է։ Նրան ողջ աշխարհում են սիրում։ Եվ հիանալի է, որ նա Հայաստան է ժամանում իր Wedding & Funeral Orchestra նվագախմբի ընդլայնված կազմով»,- երկուշաբթի մամուլի ասուլիսի ժամանակ ասաց Ռոստոմյանը։
Փառատոնի գլխավոր մենեջեր Սոնա Հովհաննիսյանն իր հերթին նշեց, որ Բրեգովիչը ելույթ կունենա բուլղարական կանանց երգչախմբի հետ։
«Երևանյան հեռանկարներ» ամենամյա 11-րդ երաժշտական փառատոնն անցկացվում է Հայաստանի նախագահ Սերժ Սարգսյանի բարձր հովանու ներքո, Հայաստանի մշակույթի նախարարության հետ համագործակցությամբ: Այս տարի փառատոնը բացվել է մարտի 6-ին՝ աշխարհահռչակ ջութակահար Պինկաս Ցուկերմանի ելույթով:-0-
