Հայ և ռուս բժիշկները մասնակցում են երկուշաբթի Երևանում մեկնարկած «Մարդու առողջությունը» իններորդ գիտաբժշկական կոնգրեսին:
«Այս տարի կոնգրեսը, որի շրջանակներում կներկայացվեն 162 գիտական աշխատություններ, անցկացվում է «Հայաստան-Ռուսաստան. բժշկություն առանց սահմանների, նոր հորիզոններ» նշանաբանի ներքո», - երկուշաբթի լրագրողներին տեղեկացրեց ՀՀ առողջապահության նախարարության Առողջապահության ազգային ինստիտուտի տնօրեն Դերենիկ Թումանյանը:
Նրա խոսքերով՝ եռօրյա կոնգրեսը Հայաստանի երիտասարդ մասնագետներին աննախադեպ հնարավորություն կընձեռի ծանոթանալ բժշկության ոլորտում արձանագրված նորագույն համաշխարհային ձեռքբերումների հետ:
«Կոնգրեսին մասնակցում է Ռուսաստանից ժամանած խոշորագույն մասնագետների պատվիրակություն՝ Ռուսաստանի ԳԱԱ ակադեմիկոս Առնոլդ Ադամյանի գլխավորությամբ, որը Հայաստանի գիտական-բժշկական հասարակությանը կներկայացնեն իրենց ձեռքբերումները անոթային և դիմածնոտային վիրաբուժության, ինչպես նաև նյարդաբուժության ոլորտներում», - ավելացրեց նա:
Միաժամանակ Թումանյանն ասաց, որ ի տարբերություն նախորդ տարիների՝ այս տարի կոնգրեսի շրջանակներում գործելու է ութ մասնագիտացված բաժին:
Միջոցառման շրջանակներում Առողջապահության ինստիտուտում մեկնարկել է ինը դեղագործական ընկերությունների՝ ինչպես հայրենական, այնպես էլ օտարերկրյա ընկերությունների ներկայացուցչությունների արտադրանքի ցուցահանդեսը:
«Մարդու առողջությունը» կոնգրեսի կազմկոմիտեի նախագահ, բժշկական գիտությունների թեկնածու Դավիթ Պետրոսյանի խոսքերով՝ ցուցահանդեսի նպատակը գիտական ձեռքբերումները պրակտիկայի հետ համատեղելու փորձն է:
«Վերջիվերջո, բժիշկներն աշխատում են դեղորայքի հետ, և շատ կարևոր է, որ երեք օրվա ընթացքում նրանք բացի գիտական զեկույցներից կարող են նաև ծանոթանալ դեղագործական ընկերությունների արտադրանքի հետ», - ասաց նա:
Կոնգրեսի շրջանակներում ատամնաբույժերի համար վարպետության-դասընթացներ են նախատեսված:
Կոնգրեսի կազմակերպիչներն են ՀՀ առողջապահության նախարարությունը, Առողջապահության ազգային ինստիտուտը, «Հանուն առողջության» բարեգործական կազմակերպությունն ու Ռուսաստանի հայերի միությունը, որն ապահովում է ռուսաստանցի մասնագետների մասնակցությունը:-0-
