ՀՀ նախագահը մարդկության զարգացման մեջ անգնահատելի է համարում ՄԱԿ-ի դերը

ՀՀ նախագահ Սերժ Սարգսյանն անգնահատելի է համարում Միացյալ Ազգերի Կազմակերպության դերը մարդկության զարգացման մեջ։

«Այս 65 տարիները ցույց տվեցին, որ ՄԱԿ-ի դերակատարությունը մարդկության զարգացման գործում ուղղակի անփոխարինելի է: Ուրախ եմ, որ  Հայաստանը, 1992թ. դառնալով ՄԱԿ-ի անդամ, որդեգրելով համամարդկային արժեքների և մարդու իրավունքների պաշտպանությունը, ժողովրդավորություն հաստատելու սկզբունքները` որպես պետական գաղափարախոսության անբաժանելի մաս, ակտիվորեն ներգրավվեց ՄԱԿ-ի մարմիններում և հնարավորության սահմաններում կարողացավ իր աշխատանքով նպաստել ընդհանուր գործին»,-երկուշաբթի ասաց Սարգսյանը՝ Կազմակերպության 65-ամյակի կապակցությամբ այցելելով Միացյալ Ազգերի Կազմակեպություն, հաղորդում է պետության ղեկավարի մամուլի ծառայությունը։

Նախագահն ընդգծեց, որ Հայաստանը հետագայում նույնպես պատրաստ է մասնակցել կազմակերպության աշխատանքներին՝ ընդհանուր հաջողության մեջ իր ներդրումը կատարելով։

Սերժ Սարգսյանը բարձր է գնահատել 1992 թվականից ի վեր Հայաստանում ՄԱԿ-ի գործունեությունը, որը, նախագահի խոսքով` ուղղված է եղել Հայաստանի զարգացմանն ու քաղաքացիների բարեկեցության բարձրացմանը: Հանրապետության ղեկավարը շնորհակալություն է հայտնել գրասենյակի անձնակազմին` տարբեր ոլորտներում Հայաստանի առջև ծառացած խնդիրների լուծման գործում  ունեցած մեծ ներդրման համար և մաղթել հաջողություններ:

Սերժ Սարգսյանը ՄԱԿ-ի օրվա առթիվ շնորհավորել է գրասենյակի մշտական համակարգող Դաֆինա Գերչևային և կազմակերպության գործակալությունների ու հիմնադրամների բոլոր աշխատակիցներին:

ՄԱԿ-ի հայաստանյան գրասենյակի մշտական համակարգող Գերչևան նշել է, որ կազմակերպության հայաստանյան գրասենյակի գործունեությունն անհնար կլիներ` առանց ՀՀ կառավարության հետ ռազմավարական համագործակցության:

Նա վստահեցրել է, որ համատեղ ուժերով հնարավոր է հասնել գրասենյակի առջև դրված խնդրիների լուծմանը` տարեցտարի ավելի ու ավելի բարձրացնելով Հայաստանի քաղաքացիների բարեկեցությունը:

Նախօրեին՝ հոկտեմբերի 24-ին, Միացյալ Ազգերի Կազմակերպությունը (ՄԱԿ) նշել է իր 65-ամյակը։

1945թ.-ի հոկտեմբերի 24-ին ուժի մեջ է մտել այս կազմակեպտության կանոնադրությունը, որը ստորագրվել է այն ժամանակ 51 պետությւոնների ներկայացուցիչների կողմից։ Դրանից ի վեր ողջ աշխարհում այդ տարեթիվը նշում են որպես ՄԱԿ-ի օր։

Երկրորդ համաշխարհային պատերազմից հետո ստեղծված և հետագայում նման ողբերգությունը կանխելու կոչված այս կազմակերպությունը նպաստում է աշխարհի ամրապնդմանն ու միջազգային համագործակցությանը։ ՄԱԿ-ի կազմում են ավելի քան 190 պետություններ։ -0-