ՀՀ վարչապետ Տիգրան Սարգսյանը ուրբաթ երկօրյա աշխատանքային այցով կմեկնի Եկատերինբուրգ՝ Հայաստանի Հանրապետության և Ռուսաստանի Դաշնության միջև տնտեսական համագործակցության հարցերով հայ-ռուսական միջկառավարական հանձնաժողովի 12-րդ նիստին մասնակցելու նպատակով, հաղորդում է ՀՀ կառավարության մամուլի ծառայությունը:
Այցի շրջանակներում ՀՀ վարչապետը կայցելի Ուրալի դաշնային համալսարան, որտեղ կհանդիպի համալսարանի ուսանողների և պրոֆեսորադասախոսական կազմի հետ: Սարգսյանը կայցելի նաև «Ուրալէլեկտրոմեդ» գործարան, որտեղ կհանդիպի Ուրալի մարզպետ Սերգեյ Մորոզովի հետ, կայցելի Ուրալի հայկական Սուրբ Կարապետ եկեղեցի:
Վարչապետի գլխավորած պատվիրակության կազմում են ՀՀ կառավարության աշխատակազմի ղեկավար Դավիթ Սարգսյանը, ֆինանսների նախարար Տիգրան Դավթյանը, էներգետիկայի և բնական պաշարների նախարար Արմեն Մովսիսյանը, էկոնոմիկայի նախարարի առաջին տեղակալ Կարինե Մինասյանը, տարածքային կառավարման նախարարի առաջին տեղակալ Վաչե Տերտերյանը, գյուղատնտեսության նախարարի առաջին տեղակալ Սամվել Ավետիսյանը, արտաքին գործերի նախարարի տեղակալ Շավարշ Քոչարյանը, տրանսպորտի և կապի նախարարի տեղակալ Արտաշես Ավետիսյանը, կրթության և գիտության նախարարի տեղակալ Արա Ավետիսյանը, մշակույթի նախարարի տեղակալ Արթուր Պողոսյանը, սփյուռքի նախարարի տեղակալ Ստեփան Պետրոսյանը, քաղաքաշինության նախարարի տեղակալ Ռուզան Ալավերդյանը, Արմավիրի մարզպետ Աշոտ Ղահրամանյանը, կառավարության և նախարարությունների աշխատակազմերի ներկայացուցիչներ, պաշտոնատար այլ անձինք։
Հայ-ռուսական տնտեսական միջկառավարական հանձնաժողովի նախորդ՝ 11-րդ նիստը տեղի է ունեցել Յարոսլավում 2009 թ.-ի սեպտեմբերին:-0-
