Եվրոպայի հետ Հայաստանի մերձեցման գործընթացը նորմալ հունով է ընթանում, Երևանում կայացած Եվրոպայի խորհրդի «Ժողովրդավարության ապագայի համար» եռօրյա ֆորումից հետո կազմակերպված մամուլի ասուլիսի ժամանակ հայտարարել է ՀՀ ԱԳ նախարար Էդվարդ Նալբանդյանը:
«Հայաստանի և Եվրոպայի հարաբերություններն այնքան դարավոր են, որքան երկրագնդի այդ հատվածը: Եվրոպական ընտանիքի հետ Հայաստանի մերձեցման գործընթացը նորմալ է ընթանում, քանի որ արժեքների տեսակետից մենք հավատարիմ ենք մեր ակունքներին, որոնք պատկանում են նաև Եվրոպային», - ասել է նախարարը:
Նալբանդյանը նշել է, որ շուտով Հայաստանը նշելու է անկախության 20-ամյակը՝ ավելացնելով, որ ինչպես Եվրոպայի, այնպես էլ Հայաստանի համար այդ քսան տարիները զգալի փոփոխությունների շրջան էին, «որը մենք ձեռք-ձեռքի տված անցանք»:
«Ժողովրդավարությունը կենդանի օրգանիզմ է ազգային, կրոնական առանձնահատկություններով, որը ձևավորվում և հետևողականորեն զարգանում է: Ժողովրդավարությունը պետք է շարունակական լինի, հակառակ դեպքում այն կդադարի ժողովրդավարություն լինել», - ավելացրել է ՀՀ ԱԳ նախարարը:
Նրա խոսքերով՝ միամիտ կլիներ ենթադրել, թե ֆորումի անցկացման երեք օրվա ընթացքում Երևանում կարելի կլիներ գտնել բոլոր հարցերի պատասխաններն ու բոլոր խնդիրների լուծումները:
«Այս գործընթացի արժեքն այն է, որ ժողովրդավարության խնդիրների վերաբերյալ քննարկումները կրեն շարունակական բնույթ: Մեր ընդհանուր ջանքերից է կախված, թե Եվրոպայի խորհուրդը որքան արդյունավետ քաղաքական հարթակ կարող է լինել համաեվրոպական բանավեճերի համար», - ավելացրել է Նալբանդյանը:
Հինգշաբթի աշխատանքն է ավարտել Երևանում մեկնարկած Եվրոպայի խորհրդի «Ժողովրդավարության ապագայի համար» եռօրյա ֆորումը, որին մասնակցել են եվրոպացի բարձրաստիճան պաշտոնյաներ:
Միջոցառման ընթացքում քննարկվել են Եվրոպայում ժողովրդավարության սկզբունքներն ու մարտահրավերները: Քննարկումներին մասնակցել են եվրոպացի և հայ քաղաքական գործիչներ, քաղաքացիական հասարակության, զանգվածային լրատվամիջոցների և գիտական շրջանակների ներկայացուցիչներ:
ԵԽ-ն նմանատիպ ֆորում է կազմակերպել 2005 թ.-ին Վաշինգտոնում, 2006 թ.-ին՝ Մոսկվայում, 2007 թ.-ին՝ Ստոկհոլմում, 2008 թ.-ին՝ Մադրիդում և 2009 թ.-ին՝ Կիևում մարդու իրավունքների պաշտպանության, քաղաքական կուսակցությունների դերի, ընտրական համակարգերի թեմաներով:-0-
