Հայ Առաքելական Եկեղեցու ներկայացուցիչները աղանդների և «էմո» ու «գոթերի» նման երիտասարդական շարժումների դեմ պայքարի լավագույն մեթոդը դպրոցներում քրիստոնեական դաստիարակության խստացումն են համարում:
Ղևոնդ աբեղա Մայիլյանի խոսքերով՝ ԱՄՆ-ում ստեղծված և Ռուսաստանից Հայաստան ներթափանցած «էմո» շարժումը ավերում է ցանկացած հասարակության հիմնական ինստիտուտներից մեկը՝ ընտանիքը, և դրա դեմ պայքարի լավագույն մեթոդը պրոֆիլակտիկան է, որը դպրոցներում քրիստոնեական դաստիարակության խստացում է նախատեսում:
«Բոլոր հասարակությունները հիմնված են երեք հիմնական ինստիտուտների վրա՝ դպրոց, ընտանիք, եկեղեցի, և նրանց գործունեությունն ուղղված է բոլոր ժողովուրդների ներկայի և ապագայի ապահովմանը: 1988 թ.-ից Հայաստանում սկսվել և հիմա էլ շարունակվում է գրոհն այս բոլոր ինստիտուտների վրա», - հինգշաբթի լրագրողների ասաց աբեղան:
Քայքայիչ պաշտամունքից տուժածների օգնության և վերականգնողական կենտրոնի տնօրեն Ալեքսանդր Ամարյանն իր հերթին նշեց, որ իր տվյալների համաձայն՝ այսօր Հայաստանում կա նման երիտասարտական շարժումների 3-4 հազար անդամ: Ավելին, Երևանի հենց կենտրոնում «էմո»-ի ատրիբուտիկայով վաճառքով զբաղվող խանութ է գործում:
Նա նշեց այդ կառույցներում հայտնված երիտասարդներին համապատասխան հոգեբանական օգնություն ցուցաբերելու անհրաժեշտությունը: Նրա խոսքերով՝ անհրաժեշտ է նաև աշխատանք տանել՝ ինքնասպանությունների պատճառները բացահայտելու համար, որոնք կարող են ունենալ կրոնական երանգ կամ իրականում սպանություն լինել:
Ամարյանը նաև տեղեկացրեց, որ Հայաստանում Հայ Առաքելական Եկեղեցուն չպատկանող կրոնական կամ մշակութային բնույթի տարբեր կազմակերպություններում 300-350 հազար մարդ է ներառված: Նրա խոսքերով՝ բոլոր այդ կազմակերպությունները դրսից են ներթափանցել Հայաստան և սպառնալիք են ներկայացնում, քանի որ բաց չեն գործում:-0-
