ՀՀ օմբուդսմենը հոկտեմբերի վերջին բանակում տիրող իրավիճակի վերաբերյալ հաշվետվություն կներկայացնի

ԵՐԵՎԱՆ, 21 հոկտեմբերի. /Նովոստի-Արմենիա/. ՀՀ զինված ուժերում տիրող իրավիճակի հետազոտության արդյունքները կհրապարակվեն հոկտեմբերի 27-ին, հինգշաբթի ԱԺ պրոֆիլային հանձնաժողովներում 2011թ.-ի հանրապետության պետբյուջեի նախագծի քննարկման ժամանակ հայտնեց ՀՀ մարդու իրավունքների պաշտպան Արմեն Հարությունյանը։

Վերջին շրջանում հայկական զորամասերում մի քանի միջադեպեր են տեղի ունեցել, որոնք ուղեկցվել են զինծառայողների սպանությամբ և ինքնասպանությամբ, ինչպես նաև դժբախտ պատահարներով։ Միջադեպի արդյունքում բանակում մի շարք զինծառայողներ են ձերբակալվել, մյուսների հանդեպ պատասխանատվության տարբեր միջոցներ են ձեռնարկվել։

«Ամսի 27-ին մենք կներկայացնենք բանակում տիրող իրավիճակի իրավական և հոգեբանական հետազոտության արդյունքները։ Օմբուդսմենի տարեկան հաշվետվության մեջ նաև կգնահատվի ԶՈՒ-ում տիրող իրավիճակը։ Իրավիճակը բարելավելու վերաբերյալ նաև մեր առաջարկները կներկայացնենք»,- տեղեկացրեց նա։

ՀՀ մարդու իրավունքների պաշտպանը նշեց, որ ներկայում Օմբուդսմենի աշխատակազմում մի շարք փորձագետներ են աշխատում բանակում տիրող իրավիճակի հետազոտման համար, նաև դիտարկում է անցկացնում արագ արձագանքման խումբը։

Բանակի խնդիրներով զբաղվող աշխատակիցների հաստիքի ընդլայնման անհրաժեշտության մասին հարցին պատասխանելով՝ Հարությունյանը նշեց, որ ներկայում փորձագետները լավ են կատարում իրենց պարտականությունները։

«Մենք իրավիճակի բազմակողմանի դիտարկում ենք անցկացնում», - ավելացրեց նա։-0-