ԵՐԵՎԱՆ, 20 հոկտեմբերի. /Նովոստի-Արմենիա/. Հայաստանի միջազգային համագործակցությունը 2010 թվականին որակապես նոր մակարդակի է դուրս եկել, չորեքշաբթի պրոֆիլային հանձնաժողովների նիստի ընթացքում ասաց Հայաստանի արտաքին գործերի նախարար Էդվարդ Նալբանդյանը:
«2010 թվականին Ռուսաստանի հետ մեր ռազմավարական հարաբերությունները նոր մակարդակի են հասել՝ ստորագրվել են պայմանագրեր, և դրանց կարևոր նշանակությունը ներկայացվել է աշխարհին: Միաժամանակ մեր բարեկամական գործընկերությունն ԱՄՆ-ի հետ նոր ազդակ է ստացել»,- նշեց նախարարը:
Նա հիշեցրեց, որ անցկացվել է Հայաստանի և ԱՄՆ-ի նախագահներ հանդիպում, Երևանում է գտնվել ԱՄՆ պետքարտուղար Հիլարի Քլինտոնը, Հայաստան ժամանեցին այդ երկրի մի շարք պատվիրակություններ, Միացյալ Նահանգների հետ համագործակցությունը նորմալ զարգանում է:
Արտաքին գերատեսչության ղեկավարը նշեց, որ համագործակցության նոր էջ է բացվել նաև ԵՄ-ի հետ՝ բանակցություններ են սկսվել ասոցիացիայի պայմանագրի վերաբերյալ, շուտով կմեկնարկեն վիզայի ռեժիմի պարզեցման, ազատ առևտրի վերաբերյալ բանակցությունները:
Ինչպես ընդգծեց նախարարը, ԵՄ-ի հետ համագործակցությունը Հայաստանի արտաքին քաղաքականության առաջնահերթ ուղղություններից է, իսկ Եվրամիությունը հանրապետության կարևոր գործընկերն է:
Նալբանդյանը նշեց, որ 2010 թվականին Հայաստանի նախագահ Սերժ Սարգսյանը 19 այց կատարեց, բազմաթիվ երկրների նախագահներ այցելեցին Հայաստան, չխոսելով արդեն խոսնակների, կառավարությունների ղեկավարների և նախարարների մակարդակով անցկացված այցերի մասին:
Բացի այդ, նախարարի կարծիքով, 2010 թվականին էապես ընդլայնվեց իրավապայմանագրային բազան, համագործակցություն հաստատվեց այն երկրների հետ, որոնց հետ ավելի վաղ շփումներ չեն եղել, յոթ նոր դեսպանություններ բացվեցին: -0-
