Ադրբեջանական պատմահենության դեմ պայքարելու համար Հայաստանը պետք է խոշոր մայրաքաղաքներում գրահրատարակչական կենտրոններ ստեղծի, չորեքշաբթի մամուլի ասուլիսի ժամանակ ասաց Հայոց ցեղասպանության թանգարան-ինստիտուտի տնօրեն Հայկ Դեմոյանը։
«Մոսկվայում, Փարիզում, Վաշինգտոնում և Բեռլինում պետք է հայկական գրահրատարակչական կենտրոններ ստեղծվեն՝ սեփական թարգմանիչներով...Հաճախ հայ հեղինակները ստեղծագործությունները հայերեն են գրում, որոնք այնուհետև քչերն են կարդում։ Անհրաժեշտ է հայ հեղինակների գրքերը այլ լեզուներով թարգմանել։ Սրանք տարրական մեխանիզմներ են, որոնց մասին չպետք է գիտնականը մտածի»,- ասաց Դեմոյանը։
Ըստ նրա, Ադրբեջանի հակահայկական քաղաքականության դեմ պայքարում Հայաստանի առավել ուժեղ ռեսուրսը Սփյուռքի ներուժն է, որն այսօր ամբողջովին չի օգտագործվում, ինչպես նաև՝ միջսփյուռքյան կապերը։
Դեմոյանը նաև դրական գործոն է անվանել ՀՀ նախագահ Սերժ Սարգսյանի վերջին հայտարարությունը, որն էապես տարբերվել է մյուս բարձրաստիճան հայ պաշտոնյաների հայտարարություններից։
Հոկտեմբերի 18-ին հայկական սփյուռքի լրագրողների հետ հանդիպման ժամանակ ՀՀ նախագահ Սերժ Սարգսյանը հայտնեց, որ Ադրբեջանում ակնհայտ է հակահայկական ֆաշիզմի ծավալումը, որ իրականացվում է ծրագրված կերպով և ամենաբարձր մակարդակով: «Խոսքը ոչ թե առանձին տաքգլուխների կամ ազգայնամոլությամբ տառապող հիվանդների մասին է, որոնց կարելի էր անտեսել, այլ պետական գաղափարախոսության, ըստ որի «ներկայիս Հայաստանը ստեղծվել է պատմական ադրբեջանական հողերի վրա»: Այսինքն` ոչ միայն Արցախը, այլև Երևանը, Սևանը, Սուրբ Էջմիածինը «պատմական ադրբեջանական հողեր» են: Ահա այս տրամաբանությամբ և այս համատեքստում է, որ Արցախը հայտնվում է, այսպես կոչված, «պատմական ադրբեջանական հողերի» շարքում»,- ասաց նախագահը: Նրա կարծիքով, դրա պատճառը հետևյալն է՝ Ադրբեջանը զարմանում ու զայրանում է, որ միջազգային հանրությունը և եռանախագահող երկրների նախագահները հրապարակայնորեն ճանաչում են Արցախի ժողովրդի ինքնորոշման իրավունքը: -0-
