Ղրիմում ստորագրվել է Հայաստանի և Ուկրաինայի պաշտպանության նախարարությունների միջև երկկողմ համագործակցության 2011թ. պլանը

Հայաստանի Հանրապետության և Ուկրաինայի պաշտպանության նախարարությունների միջև երկկողմ համագործակցության 2011թ. պլանն են Ղրիմում ստորագրել երկու երկրների պաշտպանության նախարարներ Սեյրան Օհանյանը և Միխայիլ Եժելը, հաղորդում է ՊՆ մամուլի ծառայությունը:

Տեղեկատվության մեջ պլանի կարևոր միջոցառումների թվում նշվում են ռազմավարական և օպերատիվ պլանավորման խորհրդակցությունները, համագործակցությունը ինժեներական և ռազմակրթական ոլորտներում:

Հանդիպման ընթացքում Օհանյանն ու Եժելը քննարկել են երկու պետությունների պաշտպանության նախարարությունների միջև ստեղծված հարաբերությունները, դրանց ծավալման և ակտիվացման ուղիները:

ՀՀ պաշտպանության նախարարը Ղրիմում մասնակցել է ԱՊՀ մասնակից պետությունների պաշտպանության նախարարների խորհրդի նիստին:

Նիստի շրջանակներում ՀՀ պաշտպանության նախարարը երկկողմ հանդիպումներ է ունեցել ԱՊՀ մասնակից պետությունների պաշտպանության նախարարների հետ, որոնց ընթացքում քննարկվել են երկկողմ ձևաչափով ընդհանուր հետաքրքրություն ներկայացնող հարցեր:-0-