Հայ-ռուսական գործընկերային հարաբերությունները պետք է նպաստեն երկու պետությունների տնտեսությունների դիվերսիֆիկացմանը, կարծում է ՀՀ վարչապետ Տիգրան Սարգսյանը:
«Ճգնաժամը մեզ շատ բան հուշեց, և ուրախալի է, որ մենք շատ համաձայնեցված ենք իրագործում մեր բարեփոխումները: Մեր առջև ծառացած առաջին խնդիրը մեր տնտեսությունների դիվերսիֆիկացումն է: Նմանատիպ խնդիր են ձևակերպել նաև Ռուսաստանի Դաշնության կառավարությունում, նմանատիպ խնդիր է ծառացած նաև մեր տնտեսության առջև», - ասել է ՀՀ կառավարության ղեկավարը Երևանում ռուսական ԶԼՄ-ների ներկայացուցիչների հետ հանդիպման ժամանակ:
Նրա խոսքերով՝ Ռուսաստանի Դաշնությունում այդ խնդիրը կապված է այն բանի հետ, որ արտահանման մեջ գերակայում է էներգետիկ հատվածը, և անհրաժեշտ է նորարարական նախագծեր իրագործել: Վարչապետը նշել է, որ Հայաստանի տնտեսության մեջ հիմնական խնդիրն այն է, որ համախառն ազգային արդյունքում շինարարության տեսակարար կշիռը շատ բարձր էր, շինարարությունից ժողովրդական տնտեսության կախվածությունը բավականին զգալի էր, և միայն մեկ ոլորտում գրանցված անկումը հանգեցրեց մակրոտնտեսական ցուցանիշների բավականին զգալի փոփոխության:
«Ակնհայտ է, որ տնտեսության դիվերսիֆիկացումը հրատապ է նաև մեզ համար: Մեր գործընկերային հարաբերությունները պետք է նպաստեն նրան, որպեսզի մենք, փոխարդակցվելով, կարողանանք դիվերսիֆիկացնել մեր տնտեսությունների կառույցները: Մենք մեր գործընկերներին նոր ներդրումային նախագծեր ենք առաջարկում, որոնք կարող են նրանց համար հետաքրքիր լինել և որոնք կարող են նպաստել նոր ոլորտների և նոր ոլորտներում ներդրումների ի հայտ գալուն», - ասել է Սարգսյանը:
Նա նաև նշել է, որ երկու երկրների տնտեսությունները համաշխարհային ճգնաժամի շատ լուրջ փորձությունների միջով անցան: «Մի կողմից, դա դիմացկունության քննություն էր, ստուգվեց այն, թե պատրա՞ստ են, արդյոք, մեր երկրների տնտեսությունները նման շոկեր տանել: Մյուս կողմից, որոշակի շոկ ապրեցին նաև երկու երկրների տնտեսությունների միջև գոյություն ունեցող կապերը, և մենք բացահայտեցինք թույլ և ուժեղ կողմերը», - ասել է ՀՀ վարչապետը:
«Ընդհանուր առմամբ, մենք գոհ ենք մեր երկրների միջև տնտեսական համագործակցության մակարդակից: Մեր հակաճգնաժամային ծրագրերն իրագործվել են ընդհանուր տրամաբանությունում, մենք մեր ռուս գործընկերների հետ հանդիպումների ժամանակ համաձայնեցնում էինք մեր հակաճգնաժամային միջոցառումները: Մեր բարեփոխումների տրամաբանությունը հասկանալի էր մեր ռուս գործընկերներին, իսկ մեզ համար հասկանալի էր նրանց կողմից իրագործվող հակաճգնաժամային միջոցառումների տրամաբանությունը», - ավելացրել է Սարգսյանը:-0-
