ՀՐԱՏԱՊ. Հայկական ընդդիմությունը պիկետ է կազմակերպել այն շենքի առջև, որտեղ անցկացվում է Եվրախորհրդի ֆորումը

ԵՐԵՎԱՆ, 19 հոկտեմբերի. /Նովոստի-Արմենիա/. Հայկական ընդդիմությունը պիկետ է անցկացնում Կառավարության ընդունելությունների տան առջև, որտեղ անցկացվում է Եվրախորհրդի «Հանուն ժողովրդավարության ապագայի» համաժողովը, տեղեկացնում է «Նովոստի-Արմենիա» գործակալության թղթակիցը իրադարձությունների վայրից։

Ինչպես լրագրողներին է հայտնել ընդդիմադիր Հայ ազգային կոնգրեսի արտաքին կապերի համակարգող Վլադիմիր Կարապետյանը, պիկետի մասնակիցները համաժողովի պատվիրակներին են ցանկանում փոխանցել Հայաստանում մարդու իրավունքների վերաբերյալ իրենց նախապատրաստած պետիցիան, ինչպես նաև «քաղբանտարկյալների» ցուցակը։

«Սակայն ոստիկանությունը թույլ չի տալիս ակցիայի մասնակիցներին մոտ գալ համաժողովի անցկացման վայրին»,- ասաց նա, հավելելով, որ պիկետը կշարունակվի մինչև համաժողովի ավարտը՝ հոկտեմբերի 21-ը։

Սկզբում պիկետին մասնակցում էր մոտ 50 մարդ, սակայն նրանց թիվն աստիճանաբար աճում է։ Ակցիայի մասնակիցները ձեռքերում ունեն այն մարդկանց լուսանկարները, ովքեր, նրանց կարծիքով, ձերբակալված են իրենց քաղաքական հայացքների համար։

Եվրոպայի Խորհրդի՝ եվրոպացի բարձրաստիճան պաշտոնյաների մասնակցությամբ «Հանուն ժողովրդավարության ապագայի» համաժողովի (հոկտեմբերի 19-21) ընթացքում կքննարկվեն Եվրոպայում ժողովրդավարության սկզբունքներն ու մարտահրավերները։ -0-