Հայաստանի պետբյուջեով բավարար միջոցներ են հատկացվել պաշտպանական ոլորտին. Ֆինանսների նախարարություն

ԵՐԵՎԱՆ, 18 հոկտեմբերի. /Նովոստի-Արմենիա/. Հայաստանի 2011 թվականի պետական բյուջեի նախագծով բավարար միջոցներ են հատկացվել պաշտպանական ոլորտին, երկուշաբթի ասաց Հայաստանի ֆինանսների նախարար Տիգրան Դավթյանը խորհրդարանական մշտական հանձնաժողովների համատեղ նիստի ընթացքում 2011 թվականի գլխավոր ֆինանսական փաստաթղթի քննարկման ժամանակ։

Հայաստանի պետբյուջեի ծախսերը 2011 թվականին հանրապետության պաշտպանական ոլորտում նախատեսված են 139,1 մլրդ դրամի (մոտ 395,8 մլն դոլար) չափով, որից 134,6 միլիարդ դրամը (մոտ 373,3 միլիոն դոլար) կկազմեն ռազմական կարիքների ծախսերը։

«Նախագծով անվտանգության և պաշտպանության ոլորտների ծախսերի բավարար չափ է նախատեսված։ 2011 թվականին Հայաստանի պաշտպանության նախարարության կարիքները կաճեն 4,5 միլիարդ դրամով (մոտ 12,5 միլիոն դոլարով)»,- հայտարարեց նախարարը։

Նրա խոսքերով, Հայկական բանակը կապահովվի անհրաժեշտ ամեն ինչով Հայաստանի պաշտպանության և անվտանգության ապահովման համար։

«Անհրաժեշտ բոլոր ֆինանսական միջոցները, որոնք պետք են Հայաստանի անվտանգության ապահովման համար, ընդգրկված են պետբյուջեում և անհրաժեշտության դեպքում դրանց չափը կարելի է մեծացնել»,- ընդգծեց նախարարը։ -0-