ԵՐԵՎԱՆ, 18 հոկտեմբերի. /Նովոստի-Արմենիա/. Հայկական հեռուստատեսությունը չի համապատասխանում հայկական սփյուռքի հոգևոր պահանջներին, կարծում է Պրահայում հրատարակվող «Օրեր» ամսագրի խմբագիր Հակոբ Ասատրյանը։
«Հայկական սփյուռքի ժամանակակից ներկայացուցիչն առավել հոգևոր հեռուստածրագրերի կարիք ունի, այլ ոչ սերիալների և զվարճալի ծրագրերի, որոնք շատ հաճախ է հեռարձակում հայկական հեռուստատեսությունը»,- երկուշաբթի լրագրողներին ասաց նա։
Ասատրյանն ընդգծեց նաև հայկական հեռուստաալիքներում մանկապատանեկան ծրագրերի գրեթե բացարձակ բացակայությունը, որոնք մեծ կրթական նշանակություն ունեն։
Ըստ նրա, նորաստեղծ հայկական համայնքներում, այդ թվում նաև Չեխիայում, հեռուստատեսության դերը կարևոր է, քանի որ հայերը հեռուստատեսությունը նախընտրում են թերթից։
«Հայաստանից հիմնականում վերջին 20 տարիների ընթացքում գաղթած մարդիկ մեծ նշանակություն չեն տալիս տպագիր խոսքին՝ նոր միջավայրում որպես հայկական մշակույթի և սովորույթների պահպանման հիմնական միջոց»,- ասաց Ասատրյանը։
Ըստ նրա, 1999թ.-ից Պրահայում հրատարակվող «Օրեր» թերթի հիմնական նպատակը հայկական մշակույթի, պատմության, ինչպես նաև քաղաքական տեսությունների մասին ոչ միայն Չեխիայի, այլ նաև ողջ Եվրոպայի հայ ընթերցողների համար որակյալ տեղեկատվություն ապահովելն է։
Հոկտեմբերի 16-ին Ղարաբաղում Լրագրողների համահայկական հինգերորդ համաժողովի աշխատանքներն ավարտելու մասին խոսելիս, Ասատրյանն ընդգծեց Հայաստանի և սփյուռքի ԶԼՄ-ների փոխադարձ ծանոթության կարևորությունը։
«Հայաստանում հաճախ են դժգոհություն հայտնում հայկական իշխանությունների գրեթե բոլոր նախաձեռնությունների հանդեպ հայկական սփյուռքի ԶԼՄ-ների համընդհանուր աջակցության կապակցությամբ, բայց Հայաստանում ապրող մարդիկ պետք է հասկանան, որ սա ոչ այդքան մեր քաղաքական տեսակետների արտահայտությունն է, որքան Հայաստանի միջազգային վարկանիշը բարձր մակարդակի բարձրացնելու ձգտում»,- ասաց նա։
Լոս Անջելեսում լույս տեսնող «Ասպարեզ» հայկական օրաթերթի խմբագիր Աբո Պողիկյանն այս համատեքստում ավելացրեց, որ հայկական սփյուռքի ԶԼՄ-ները ձգտում են շատ զուսպ արտահայտվել Հայաստանի ապրելակերպի անվայել կողմերի մասին։
«Մեր ընթերցողների շրջանում շատ մարդիկ կան, ովքեր երբեք չեն եղել Հայաստանում, և մենք պետք է փորձենք նրանց չվանել իրենց պատմական հայրենիքից»,- ասաց նա։
Ըստ Պողիկյանի, Լոս Անջելեսում այսօր հայկական թերթերի հիմնական խնդիրներից մեկը, բացի ֆինանսականից, Լոս Անջելեսի սփյուռքի երիտասարդների հայոց լեզուն չիմանալն է։
«Մեր հիմնական ընթերցողները 35-ից բարձր մարդիկ են, իսկ երիտասարդների համար մենք երկու լեզվով՝ անգլերեն և հայերեն, հատուկ շաբաթօրյա համար ենք թողարկում»,- ասաց Պողիկյանը։ -0-
