ԵՐԵՎԱՆ, 15 հոկտեմբերի. /Նովոստի-Արմենիա/. Երևանում ուրբաթ բացվել է հայտնի հայ քանդակագործ Մոմիկի 750-ամյակին (13-14 դարեր) նվիրված համաժողովը:
Մոմիկը (ծննդյան տարեթիվը մոտավորապես 1260 թ.) հայտնի ճարտարապետ է, նկարիչ, քարի վարպետ, Սյունիքի Օրբելյան իշխանների օրոք եղել է պալատական ճարտարապետ, քանդակագործ:
«Միջին դարաշրջանի հայ վարպետների, օրինակ Մոմիկի ստեղծագործությունները պետք է հանձնվեն համաշխարհային հանրության դատին՝ ցույց տալու համար, որ Հայաստանն այդ դարաշրջանում ճարտարապետության և գիտության ու արվեստի այլ ոլորտներում այնպիսի բարձունքների է հասել, որ գերազանցել է Եվրոպային», - ասաց ՀՀ ԳԱԱ հայագիտության և հասարակագիտության բաժնի քարտուղար, ակադեմիկոս Վլադիմիր Բարխուդարյանը:
Նրա խոսքերով՝ հենց այս դարաշրջանում Հայաստանում ստեղծվել են համալսարաններ, ստեղծագործել են արվեստի ու գիտության հռչակավոր գործիչները:
Նա նշեց, որ 5-7-րդ դարերը ընդունված է համարել հայկական մշակույթի զարգացման «ոսկեդար»: Միաժամանակ միջնադարյան հայկական մշակույթն իր զարգացման գագաթնակետի է հասել 10-14-րդ դարերում:
«Ցավոք, մեզ չի հաջողվել պատշաճ կերպով ուսումնասիրել այդ դարաշրջանի առանձին գործիչների աշխատանքները: Մենք պետք է շարունակենք այդ ժամանակաշրջանի ուսումնասիրությունները և ներկայացնենք դրանց արդյունքները համաշխարհային մշակութային հանրությանը», - ասաց ակադեմիկոսը:
Հռչակավոր հայ քանդակագործի 750-ամյակի տոնակատարության շրջանակներում տեղի է ունեցել Մոմիկի թանգարանի բացումը, հրատարակվել են հայերեն և անգլերեն բրոշյուրներ, թողարկվել է խճանկարային խաղ՝ վարպետի աշխատանքների պատկերմամբ, ինչպես նաև տեղի է ունեցել տոնական համերգ վարպետի հայրենիքում՝ Վայոց Ձորում:-0-
