Հայաստանի գազամատակարարումը վերականգնվել է. «ՀայՌուսգազարդ»

Դեպի Հայաստան Վրաստանի միջոցով իրականացվող ռուսական բնական գազի մատակարարումն արդեն լիովին վերականգնվել է, հինգշաբթի «Նովոստի-Արմենիա» գործակալությանը հայտնեց «ՀայՌուսգազարդ» ՓԲԸ մամուլի քարտուղար Շուշան Սարդարյանը:

«Հոկտեմբերի 14-ին, ժամը 14:05-ին վերականգնվեց Հայաստան բնական գազի մատակարարումը, որը ժամանակավորապես դադարեցվել էր Ղազախ-Սագուրամո 1000 մմ տրամագծով մայրուղային գազատարի վրա վերանորոգման և  վերականգնողական աշխատանքներ իրականացնելու կապակցությամբ»,- ասաց մամուլի քարտուղարը:

«ՀայՌուսգազարդ» ՓԲԸ-ն Հայաստանի ներքին շուկայում ռուսական բնական գազի մատակարարման և տեղաբաշխման մենաշնորհային իրավունք ունի։ Ընկերությունը ստեղծվել է 1997 թ.-ին, նրա բաժնետերերն են «Գազպրոմ» ԲԲԸ-ն և Հայաստանի կառավարությունը:

Անհրաժեշտության դեպքում Հայաստանի սպառողների գազամատակարարումն իրականացվում է Աբովյանի գազապահեստարանի պաշարների հաշվին, որը Հայաստանի գազատրանսպորտային համակարգի (ԳՏՀ) գլխավոր տարրերից մեկն է, որն ապահովում է հանրապետության էներգետիկ անվտանգությունը։ Այն ստեղծվել է 1962 թ.-ին՝ քարաղի նստվածքաշերտում՝ շուրջ 800-1000 մետր խորության վրա և այսօր թույլ է տալիս պահեստավորել մոտ 110 միլիոն խորանարդ մետր գազ։ ԳՏՀ-ի օբյեկտների շարքից դուրս գալու դեպքում այս կայանը, կախված տարվա եղանակից, ի վիճակի է կարևորագույն սպառողներին վառելիքով մատակարարել 1-1,5 ամսվա ընթացքում։ --0—