ՀՀ կառավարությունը ճշտել է աշնանային զորակոչի անցկացման կարգը

ՀՀ կառավարությունը հինգշաբթի նիստի ժամանակ որոշում է ընդունել աշնանային զորակոչի անցկացման մասին, որում ճշտվել են կազմակերպչական հարցերը: Ինչպես տեղեկացրեց ՀՀ պաշտպանության նախարար Սեյրան Օհանյանը, կառավարության որոշմամբ սահմանվել են զորակոչը պատշաճ կերպով կազմակերպելու հետ կապված հարցերը, ինչպես նաև պատասխանատու գերատեսչությունները:

ՀՀ կառավարության որոշմամբ Հանրապետական զորակոչային հանձնաժողով է ձևավորվել, որի կազմում ներառվել են ՀՀ պաշտպանության նախարարը, արտգործնախարարը, առողջապահության նախարարը, տրանսպորտի և կապի նախարարը, կրթության և գիտության նախարարը, ՀՀ ԶՈւ Գլխավոր շտաբի պետը:

Հոկտեմբերի 7-ին ՀՀ նախագահ Սերժ Սարգսյանը հրամանագիր է ստորագրել 2010 թվականի աշնանային զորակոչ անցկացնելու և զորացրում կատարելու մասին: Հրամանագրի համաձայն, 2010 թվականի հոկտեմբեր-դեկտեմբեր ամիսներին կանցկացվի Հայաստանի Հանրապետության արական սեռի այն քաղաքացիների պարտադիր զինվորական և այլընտրանքային ծառայությունների աշնանային զորակոչը, որոնց 18 տարին լրանում է մինչև զորակոչի օրը, ինչպես նաև այն քաղաքացիների, ովքեր կորցրել են նախկինում ստացած պարտադիր զինվորական ծառայության զորակոչից տարկետման իրավունքը:

Բացի այդ, հրամանագրին համապատասխան, 2010 թվականի հոկտեմբեր-դեկտեմբեր ամիսներին կզորացրվեն սահմանված ժամկետում պարտադիր զինվորական ծառայություն անցած զինծառայողները:-0-