Սարգսյանը ցավակցական հեռագիր է հղել Ուկրաինայի նախագահին 43 մարդու մահվան պատճառ դարձած խոշոր ՃՏՊ-ի կապակցությամբ
ԵՐԵՎԱՆ, 13 հոկտեմբերի. /Նովոստի-Արմենիա/. ՀՀ նախագահ Սերժ Սարգսյանը ցավակցական հեռագիր է հղել իր ուկրաինացի գործընկեր Վիկտոր Յանուկովիչին Դնեպրոպետրովսկում տեղի ունեցած վթարի կապակցությամբ, որը 43 մարդու կյանք է խլել, հաղորդում է ՀՀ նախագահի մամուլի ծառայությունը:
«Խորապես ցավակցում եմ Դնեպրոպետրովսկում գնացքի և ավտոբուսի բախման հետևանքով մարդկանց ողբերգական մահվան կապակցությամբ: Անկեղծորեն կիսում եմ զոհվածների հարազատների ու մտերիմների վիշտը», - նշվում է ցավակցական հեռագրում:
Նախագահ Սարգսյանը զոհվածների հարազատներին ու մտերիմներին մաղթել է հոգու տոկունություն, իսկ այդ ահավոր աղետից տուժածներին` շուտափույթ ապաքինում:
Այսօր Ուկրաինայում Սգո օր է հայտարարվել Դնեպրոպետրովսկի մարզում գտնվող Մարգանեց քաղաքում երեքշաբթի տեղի ունեցած ՃՏՊ-ի հետևանքով զոհվածների համար: ԱԻՆ-ի տվյալների համաձայն՝ ավտոբուսում 51 մարդ է եղել, այդ թվում նաև վարորդը: Այս պահին հիվանդանոցում է գտնվում ութ տուժած:-0-
