Հունաստանը հունվարին սպասում է ՀՀ նախագահի այցին

Հունվարին սպասվող Հայաստանի նախագահ Սերժ Սարգսյանի այցը Հունաստան էլ ավելի կամրապնդի երկու երկրների բարեկամական հարաբերությունները և կխթանի միջպետական փոխգործակցությունը, Հունաստանում պաշտոնական այցով գտնվող ՀՀ ԱԺ խոսնակ Հովիկ Աբրահամյանի հետ նախօրեին տեղի ունեցած հանդիպման ժամանակ ասել է Հունաստանի նախագահ  Կարոլոս Պապուլիասը:

«Հունաստանի նախագահը կարևորեց միջխորհրդարանական և տնտեսական համագործակցության ակտիվացումը և ընդհանրապես հարաբերությունների խորացումը բոլոր բնագավառներում», - չորեքշաբթի հաղորդում է ՀՀ ԱԺ մամուլի ծառայությունը:

Պապուլիասը բարձր գնահատեց երկու երկրների միջև  գոյություն ունեցող դարերից եկող բարեկամական և ջերմ  հարաբերությունները, ինչը պայմանավորված է նաև պատմական ընդհանրությամբ և ճակատագրերի նմանությամբ: «Եվ հայերը, և հույները տուժել են Թուրքիայի կողմից», - նշել է նա:

Հունաստանի նախագահը ափսոսանք է հայտնել, որ մինչ օրս Թուրքիան ներողություն չի խնդրել հայերից Օսմանյան կայսրության իրականացրած ոճրագործության համար, ինչպես դա արեց Գերմանիան`  ներողություն խնդրելով հրեաներից նացիստների իրագործած հոլոքոսթի համար:

ՀՀ ԱԺ նախագահ Հովիկ Աբրահամյանը շնորհակալություն հայտնելով ջերմ ընդունելության համար` նշեց, որ Հայաստանի անկախությունից ի վեր Հունաստանի հետ ձևավորվել են ամուր գործընկերային հարաբերություններ, որոնք հիմնված են երկու ժողովուրդների միջև դարավոր բարեկամության վրա:

Նա բարձր գնահատեց Հայաստանի և Հունաստանի միջև հաստատված հարաբերությունները, որոնք կարևոր գրավական են տարբեր ոլորտներում համագործակցության հետագա զարգացման և խորացման համար:

Խոսնակը նշեց, որ Հայաստանը կարևորում է Հունաստանի հետ հարաբերությունների թե երկկողմ և թե բազմակողմ ձևաչափերով զարգացումը:-0-