Ղարաբաղում հոկտեմբերի 12-16-ը կանցկացվի Լրագրողների համահայկական հինգերորդ համաժողովը

ԵՐԵՎԱՆ, 8 հոկտեմբերի. /Նովոստի-Արմենիա/. Արցախում հոկտեմբերի 12-16-ը կանցկացվի «21-րդ դարի մարտահրավերները. տեղեկատվական անվտանգություն և հայկական լրագրություն» թեմայով Լրագրողների համահայկական հինգերորդ համաժողովը, ուրբաթ լրագրողների տեղեկացրեց ՀՀ սփյուռքի նախարար Հրանուշ Հակոբյանը:

Համաժողովի կազմակերպիչներն են ՀՀ սփյուռքի նախարարությունը, ԶԼՄ-ների համահայկական ասոցիացիան և Հայաստանի ժուռնալիստների միությունը:

«Համաժողովն անցկացվում է Լեռնային Ղարաբաղում, որպեսզի լրագրողներն ավելի մոտիկից ծանոթանան Լեռնային Ղարաբաղի կենսական խնդիրների հետ և կարողանան իրենց հետագա աշխատանքում պատշաճ կերպով իրազեկված լինել», - ասաց նախարարը:

Հակոբյանի խոսքերով՝ համաժողովին կմասնակցեն Հայաստանի և սփյուռքի ԶԼՄ-ների ղեկավարները, ինչպես նաև տարբեր ԶԼՄ-ների թղթակիցներ:

Համաժողովին կմասնակցի 27 երկիր ներկայացնող 200 լրագրող, որոնց թվում են ԱՄՆ-ն, Ավստրալիան, Արգենտինան, Բելառուսը, Բուլղարիան, Կանադան, Սիրիան:

Նախարարի խոսքերով՝ քննարկման հիմնական թեման կդառնա Հայաստանում և սփյուռքում ԶԼՄ-ների ներկա իրավիճակը, ինչպես նաև այդ ոլորտում գոյություն ունեցող խնդիրները:-0-