Արոնյանը Եվրոպայի շախմատի թիմային առաջնությունում հաջող հանդես գալու հույս ունի

Հայ գրոսմայստեր Լևոն Արոնյանը հուսով է, որ Խանտի Մանսիյսկում կայացած Համաշխարհային 39-րդ օլիմպիադայում անհաջող ելույթից հետո հայ շախմատիստները լավ արդյունքներ կցուցադրեն Բուլղարիայի Պլովդիվ քաղաքում հոկտեմբերի 16-ին մեկնարկող Եվրոպայի թիմային առաջնությունում:

Հայաստանի շախմատի տղամարդկանց հավաքականը Շախմատի 39-րդ օլիմիադայում (սեպտեմբերի 19-ից հոկտեմբերի 4-ը) 149 թիմերի շրջանում զբաղեցրել է յոթերորդ տեղը: Հայ շախմատիստներին, ովքեր Օլիմպիական կրկնակի չեմպիոններ են, չհաջողվեց կրկնել երկու նախորդ օլիմպիադաների (Դրեզդեն 2008 թ. և Թուրին 2006 թ.) հաջողությունը:

«Ես հախուռն զգացմունքներ ունեմ այս օլիմպիադայի կապակցությամբ: Իմ թիմը հիասթափության պահեր է ապրել, սակայն իմ անհատական արդյունքը լավագույններից մեկն էր», - գրել է Արոնյանը Facebook սոցիալական ցանցի իր էջում:

Խանտի Մանսիյսկում կայացած օլիմպիադայում առաջին խաղատախտակի մոտ խաղացող շախմատիստների խաղի արդյունավետության ցուցանիշով արծաթե մեդալի արժանացած Արոնյանը շատ  քիչ զիջել է Վասիլի Իվանչուկին:

Միաժամանակ Արոնյանն ընդգծել է, որ հայկական հավաքականը հզոր թիմային ոգի ունի: «Հուսով եմ, որ դա մեզ լավ արդյունքներ կապահովի Եվրոպայի թիմային առաջնության ժամանակ», - նշել է գրոսմայստերը:

Արոնյանը մասնակցելու է Եվրոպայի թիմային առաջնությանը «ՄԻԿԱ-Երևան» հայկական ակումբի կազմում, որը նախորդ տարի Մակեդոնիայի Օգրիդ քաղաքում կայացած առաջնության արդյունքում զբաղեցրել էր երկրորդ տեղը:-0-