Հայաստանը ցանկանում է ուկրաինացի ներդրողներին տեսնել տնտեսության գերակա ճյուղերում

ԵՐԵՎԱՆ, 8 հոկտեմբերի. /Նովոստի-Արմենիա/. Հայաստանը ցանկանում է ուկրաինացի ներդրողներին տեսնել տնտեսության գերակա ճյուղերում, երկրի կառավարության ծրագրին համապատասխան, ասել է Հայաստանի վարչապետ Տիգրան Սարգսյանն ուկրաինական «Պրոֆիլ» պարբերականին տված հարցազրույցում։

«Մենք կարծում ենք, որ անհրաժեշտ է նոր ազդակ հաղորդել հայ-ուկրաինական միջկառավարական հանձնաժողովին, որպեսզի մենք դիտարկենք տնտեսական հարաբերությունների ողջ շրջանակը և կարողանանք պոտենցիալ հետաքրքիր նախագծեր բացահայտել»,- ասաց նա։

Սարգսյանը նշեց, որ Հայաստանում շատ դինամիկ է զարգանում ՏՏ ոլորտը, հայտարարելով, որ երկիրը լեռնահանքային մետաղագործության բավական լուրջ հումքային պաշարներ ունի, և «քանի որ Ուկրաինայում մետաղագործությունը լավ է զարգացած, մենք շահագրգռված ենք համագործակցությամբ այս ճյուղում»։

«Մենք Հայաստանում մետաղագործական խոշոր գործարանների կառուցման շատ հետաքրքիր նախագծեր ունենք և հրավիրում ենք մեր ուկրաինացի գործընկերներին ծանոթանալու դրանց հետ»,- ասաց նա։

Պոտենցիալ համագործակցության այլ ուղղությունների թվում վարչապետը նշեց ոչ մետաղական հանածոները, բազալտը, շինանյութերը, ինչպես նաև մեքենաշինությունը։

«Այժմ մենք աշխատում ենք Հայաստանում արտահանման համար նախատեսված հավաքվող արտադրամասերի ստեղծման վրա։ Կարծում եմ, որ այստեղ նույնպես կարող է հետաքրքիր համագործակցություն լինել ուկրաինացի գործընկերների հետ»,- ասաց նա։

Հիշեցնելով, որ խորհրդային տարիներին Հայաստանը զբոսաշրջիկների մեծ հոսք է ընդունել Ուկրաինայից, կառավարության ղեկավարը նշեց, որ երկիրը վերականգնում է ավանդական զբոսաշրջային սխեմաները, որոնք ծանոթ են եղել զբոսաշրջության սիրահարներին և կարող են հետաքրքրել ուկրաինացի ճանապարհորդներին։

Սարգսյանն ասել է նաև, որ Ուկրաինայի վարչապետ Նիկոլայ Ազարովի հետ հանդիպման ընթացքում քննարկվել է երկկողմ համագործակցությանը նոր խթան հաղորդելու մտադրությունը։ -0-