Մեկ միլիոն հայ փախստականներ իրավունք ունեն մասնակցել Ադրբեջանի խորհրդարանական ընտրություններին. վեհաժողովի ղեկավար

ԵՐԵՎԱՆ, 7 հոկտեմբերի. /Նովոստի-Արմենիա/. Մեկ միլիոն հայ փախստականներ Ադրբեջանից իրավունք ունեն մասնակցել նոյեմբերի 7-ին Ադրբեջանում կայանալիք խորհրդարանական ընտրություններին, հինգշաբթի լրագրողներին հայտարարեց Ադրբեջանի հայերի վեհաժողովի ղեկավար Գրիգորի Այվազյանը:

«Եթե ընտրություններին մասնակցելու մեր պահանջները չբավարարվեն, ապա այդ ընտրությունները ևս, ինչպես 1990-ականների սկզբից Ադրբեջանում անցկացված բոլոր ընտրությունները, կհամարվեն ոչ լեգիտիմ, քանի որ Ադրբեջանի շուրջ 1 միլիոն քաղաքացի չի ստանա ընտրություններին մասնակցելու իրավունք», - ասաց Այվազյանն՝ ավելացնելով, որ Ադրբեջանը մերժման դեպքում այլևս բարոյական իրավունք չի ունենա խոսել Ղարաբաղում անցկացված խորհրդարանական և նախագահական ընտրությունների ոչ լեգիտիմության մասին:

Լինելով Ադրբեջանից հայ փախստական՝ Այվազյանը ցանկանում է մասնակցել Ադրբեջանի խորհրդարանական և նախագահական ընտրություններին, ինչի կապակցությամբ նա դիմել է ՄԱԿ-ի փախստականների հարցերով գերագույն հանձնակատարի ներկայացուցչություն, որպեսզի Միացյալ ազգերի կազմակերպության միջնորդությամբ նրան անվտանգության երաշխիքներ տրամադրվեն: Բացի այդ, Վեհաժողովը պաշտոնապես դիմել է Ադրբեջանի Կենտրոնական ընտրական հանձնաժողով:

Այվազյանը ընդգծեց, որ Վեհաժողովը ԿԸՀ-ին պատվիրված նամակի տեսքով ուղարկված իր հայցին այդպես էլ պաշտոնական պատասխան չի ստացել:

Նրա կարծիքով՝ Ադրբեջանը հիմա փակուղու առջև է կանգնած: «Եթե Ադրբեջանը չի կարող Բաքվում ապահովել նույնիսկ մի հայի անվտանգությունը, ապա ինչպես է ապահովելու Ղարաբաղի հայերի անվտանգությունը Ադրբեջանին Ղարաբաղի միանալու դեպքում», - ասաց Այվազյանը:

Նա կարծում է, որ եթե Բաքուն վերջնականապես զրկի հայերին ընտրություններին մասնակցելու իրավունքից, ապա Վեհաժողովը ստիպված կլինի անցկացնել սեփական ընտրությունները և ստեղծել Ադրբեջանի այլընտրանքային կառավարություն:

Ադրբեջանի հայերի վեհաժողովը 2007 թ.-ին գրանցվել է Հայաստանի արդարադատության նախարարության կողմից: -0-