Սամվել Բալասանյանը ՀՀ ազգային ժողովի նոր փոխխոսնակ է ընտրվել

Սամվել Բալասանյանը 74 «կողմ» ձայնով ՀՀ ազգային ժողովի նոր փոխխոսնակ է ընտրվել։ Նրա թեկնածությանը միայն 6 պատգամավոր է դեմ քվեարկել։

Բալասանյանի թեկնածությունը միակն էր փոխխոսնակի պաշտոնին ներկայացված  թեկնածուներից։

«Բարգավաճ Հայաստան» կոալիցիոն կուսակցությունն Ազգային ժողովի փոխխոսնակի պաշտոնին առաջադրել է Բալասանյանի թեկնածությունն այն բանից հետո, երբ կուսակցության որոշմամբ Արևիկ Պետրոսյանն աշխատանքից ազատվելու մասին դիմում է գրել։

Հինգշաբթի պատգամավորներին դիմելով` Բալասանյանը երախտագիտություն է հայտնել իր կուսակցական ընկերներին խոսնակի տեղակալի պաշտոնին իր թեկնածությունն առաջադրելու համար:

«Մեծ վստահություն է այդքան բարձր քաղաքական պաշտոնին իմ թեկնածությունն առաջադրելը: Սա մեծ պատասխանատվություն է, որը ես, ձեր ձայները ստանալու դեպքում, կկրեմ ոչ միայն կուսակցության, այլ նաև կոալիցիայի և այն ծրագրերի առջև, որոնք ամրագրված են կոալիցիոն համաձայնագրում»,- ասաց Բալասանյանը:

Կոալիցիոն հուշագրի համաձայն՝ փոխխոսնակներից մեկի պաշտոնը պատկանում է  ԲՀԿ-ին։ Նախագահի և մյուս ուրիշ փոխխոսնակի պաշտոնն ամրագրված է իշխող Հայստանի Հանրապետական կուսակցությանը։

Սամվել Բալասանյանը ծնվել է 1954թ.-ի հոկտեմբերի 12-ին Լենինական քաղաքում (Գյումրի)։

Ավարտել է Լենինականի Մ.Նալբանդյանի անվան պետական մանկավարժական ինստիտուտը, Մոսկվայի սննդային արդյունաբերության ինստիտուտը։ 1999թ.-ից ՀՀ ազգային ժողովի պատգամավոր է ընտրվել։ 2005թ.-ին պարգևատրվել է ՀՀ ազգային ժողովի Պատվո մեդալով։ 2007թ.-ին մեծամասնական համակարգով խոհրդարան է ընտրվել։ 2010թ.-ից «Բարգավաճ Հայաստան» կուսակցության փոխնախագահն է։ Ամուսնացած է, ունի երեք երեխա։ -0-